Balakəndə 2-si “Kalaşnikov” avtomatı olmaqla ümumilikdə 5 odlu silah aşkar edilib. Balakən Rayon Polis Şöbəsinin əməkdaşları tərəfindən qanunsuz olaraq saxlanılan odlu silah-sursatın aşkar edilərək götürülməsi istiqamətində əməliyyatlar keçirilib. Keçirilən əməliyyatlar zamanı Gərəkli kəndi ərazisində 2 ədəd “Kalaşnikov” markalı avtomat, həmin silahlara məxsus 2 sandıqça və 57 ədəd patron aşkar olunaraq polis əməkdaşları tərəfindən götürülüb. Polis şöbəsinin əməkdaşlarının keçirdikləri digər əməliyyat tədbirləri nəticəsində isə rayon sakinləri – Mahir Ağcayevdən, Salim Umrayevdən və Ramiz Ömərovdan qanunsuz saxladıqları nömrəsi silinmiş 3 ədəd “İJ” markalı ov tüfəngi götürülüb. Faktlarla bağlı araşdırma aparılır.

Balakən Polisi “Təmiz hava” aylığı çərçivəsində rayon ərazisində profilaktik tədbir keçirib. Avtomobillərin atmosferə ixrac etdiyi dəm qazının miqdarı xüsusi cihaz vasitəsilə yoxlanılıb. Ekoloji normalara cavab verməyən avtomobil sürücüləri inzibati qaydada məsuliyyətə cəlb olunublar. Həmçinin, yol hərəkəti təhlükəsizliyinin təmin edilməsi məqsədi ilə polis əməkdaşları tərəfindən həyata keçirilən tədbirlər nəticəsində avtomobili narkotik vasitənin təsiri altında və sürücülük hüququ olmadan idarə edən, sərxoş vəziyyətdə sükan arxasına əyləşən, təhlükəsizlik kəmərindən istifadə etməyən intizamsız sürücülər də aşkar olunub. Cari il ərzində spirtli içkinin və narkotik vasitənin təsiri altında avtomobil idarə edən ümumilikdə 80 sürücü barəsində qanunvericiliyə uyğun tədbir görülüb. Avtomobilinə əlavə avadanlıqlar quraşdıran, eləcə də digər yol hərəkəti qaydalarını pozan sürücülər barəsində də inzibati protokollar tərtib edilib.

Dövlət Məşğulluq Agentliyi tərəfindən ölkəmizdə ikinci dəfə keçirilən Peşələr Festivalının növbəti ünvanı Zaqatala şəhəri olub. Festivalda ƏƏSM- nazirliyinin, rayon icra hakimiyyətinin, dövlət və özəl qurumların rəsmiləri, işəgötürənlər və gənclər iştirak edib.Qonaqlar Festivalda təqdim olunan peşələrin stendləri ilə tanış olub, ekspertlərlə söhbət ediblər. “Peşəni peşəkardan soruş!” devizi ilə keçirilən Festivalda iştirakçılar peşələr üzrə hansı bacarıqların tələb olunduğunu öyrənir, müxtəlif peşələr üzrə ekspertlərin təqdimatlarında iştirak edir və peşələrlə əyani şəkildə tanış olmaq imkan əldə edirlər. Bundan başqa Festival iştirakçılarına Agentliyin Mərkəzi Karyera filialının karyera məsləhətçiləri tərəfindən peşəyönümü məsləhət xidmətlərinin göstərilməsi təmin edilir, onlara xidmətlər haqqında məlumat verilir.

Həftə içi 5 gün səhər saat 09:00-dan 11:00-a kimi Kanal S-də \"Xəbərin var?\" adlı verilişin aparıcıları İsa Şükürov və Elyar Sadiqovdur.

Bu gün səhər saat 05 radələrində Qax şəhəri ərazisində Səbuhi Poladovun idarə etdiyi “Niva” markalı avtomobil yolun kənarında dayanan traktorun qoşqusuna çırpılaraq aşıb. Qəza nəticəsində “Niva” markalı avtomobildəki sərnişin, 48 yaşlı Qax şəhər sakini Coşqun Qocayev aldığı xəsarətlərdən hadisə yerində ölüb, sürücü isə xəstəxanaya yerləşdirilib. Faktla bağlı araşdırma aparılır.

Qax sakini fermer Müşfiq Sultanovun böyük fındıqçılıq sahəsi var. O və ailəsi hər il bu bağdan topladığı fındıqla dolanır. Bu il də Müşfiq Sultanovun bağdan böyük gözləntiləri var idi. Ancaq onu xoş olmayan hadisə gözləyirdi. İllərdir fındıqçılıqla məşğul olan Qaxlı fermer Müşfiq Sultanov bu il də sahəsindən bol məhsul götürəcəyinə ümid edirdi. Fındıq bağlarında bol və keyfiyyətli məhsul var idi. Ancaq məhsulun yığılmasına bir neçə gün qalmış bağa gələn fermer məhsulunun bir anda yoxa çıxdığını görür. Müşfiq Sultanov eyni zamanda təsərrüfatının təbii fəlakətlərdən də əziyyət çəkdiyini deyir. Fermer yağış, dolu, güclü külək və sair fəlakətlərin məhsuldarlığa ciddi ziyan vurduğunu bildirir. Fermerimizin bu günə qədər niyə sahəsini sığortalatmadığına cəldikdə isə Müşfiq Sultanov bundan xəbərsiz olduğunu bildirib. Qeyd edək ki, qanunvericiliyə görə, Azərbaycanda aqrar sığorta vasitəsilə 41 bitki sığortalana bilər ki, onlardan biri də fındıqdır. Ancaq əksər fermerlər Müşfiq Sultanov kimi hələ də ya sığortadan xəbərsizdirlər ya da sığortanın şərtləri ilə tanış deyillər. Belə ki, fermerlərin böyük bir hissəsi sığortanın yalnız onların məhsullarını təbii fəlakətlərə qarşı qoruduğunu düşünür. Lakin bura oğurluğa görə də ödənişlərin daxil olduğundan əksər fermerlər məlumatsızdır. Sahəsini sığortaladan və oğurluq halı ilə rastlaşan fermerlər onlara dəymiş ziyanı geri ala bilərlər. Ancaq bunun üçün sahədən oğurluq edildiyi müvafiq orqanlar tərəfindən təsbit edilməlidir. Bu halda fermer hətta üzərindən bir neçə ay keçməsinə baxmayaraq sığorta üçün müraciət edə bilər. Aqrar sığorta vasitəsilə həm fındıq məhsulunu, həm də fındıq ağacını sığorta etmək olar. Fındıq məhsulunun sığortalanması üzrə sığorta haqqı ölkənin regionlarından asılı olaraq fərqlənir. Məsələn, Şəki-Zaqatala ərazisində 1 hektar sahədən təqribən 6000 manatlıq fındıq məhsulu yığılan sahənin sığortalanması üçün sığorta haqqı 240 manat təşkil edir. Bu məbləğin 50%-ni, yəni 120 manatını fermerlərə dəstək üçün dövlət ödəyir, fermer isə yalnız 120 manat ödəməklə bağını sığorta edə bilir.