Milli Məclisə növbədənkənar seçkilərlə bağlı Mərkəzi Seçki Komissiyasının Daxili İşlər Nazirliyi ilə birgə layihəsi çərçivəsində Şəkidə seminar-müşavirə keçirilib.

Şəki Rayon Polis şöbəsində keçirilən seminar-müşavirədə Mərkəzi Seçki Komissiyasının, Şəki rayon Polis İdarəsinin rəsmiləri, dairə seçki komissiyalarının sədrləri iştirak ediblər. Tədbirdə Milli Məclisə seçkilərin hazırlanıb keçirilməsində, seçkiqabağı təşviqat dövründə, habelə səsvermə günü və ondan sonrakı proseslərdə polis əməkdaşlarının qanunvericiliklə müəyyənləşdirilmiş rol və vəzifələrindən danışılıb.

Seçki kampaniyası dövründə və seçkilərin keçirildiyi gün ictimai qaydanın təmin edilməsi ilə bağlı polis əməkdaşlarının hüquq və vəzifələri, seçkidən sonrakı dövrdə seçki bülletenlərinin, digər seçki sənədlərinin dairə və Mərkəzi Seçki Komissiyasına gətirilməsi zamanı təhlükəsizlik tədbirlərinin görülməsi barədə məlumat verilib. Sonda suallar cavablandırılıb.

Şəkidə aşıq və şair Molla Cümənin anadan olmasının 170 illiyinə həsr olunan "İsmi Pünhan" adlı yubiley tədbiri keçirilib. Tədbirdə Şəki Regionla Elmi mərkəzinin əməkdaşları, ziyalılar, Molla Cümənin nəticələri, şəhər ictimaiəti iştirak ediblər.

Çıxış edənlər ölkəmizdə sənətə, sənətkara, diqqət və qayğıdan, aşıq sənətinin inkişafı naminə həyata keçirilən məqsəd yönlü işlərdən danışıblar. Vurğulanıb ki, məhz bu işlər nəticəsində aşıq sənəti UNESCO-nun Bəşəriyyətin Qeyri-Maddi Mənəvi İsrininin Reprezentativ siyahısına daxil edilib.

Aşıq sənətinin görkəmli nümayəndələrindən olan "İsmi Pünhan" təxəllüslü, şəkili Molla Cümənin həyat və yaradıcılığına, ədəbi irsinə nəzər salınıb. Həmçinin Molla Cümənin yubiliyinə həsr olunan videoçarx nümayiş olunub. Tədbirin bədii hissəsində Molla Cümənin şeirləri və mahnıları səsləndirilib.