İsmayıllıda avtomobil qəzası baş verib. Sürücü Naxçıvan sakini 25 yaşlı Abdurezzaq Şirinov idarə etdiyi “Hunday” markalı avtomobildə idarəetməni itirərək maşını aşırıb. Hadisə nəticəsində, avtomobilin sürücüsü və sərnişinlər Naxçıvan sakinləri 60 yaşlı İsa Abbasov, 57 yaşlı Zəminə Abbasova müxtəlif dərəcəli bədən xəsarətləri ilə rayon mərkəzi xəstəxanasına çatdırılıblar. Onların vəziyyətinin orta-ağır olduğu bildirilir. Faktla bağlı araşdırma aparılır.

Şəkidə son bir neçə ayda Daşbulaq, Daşüz, Şorsu və daha 4 kənddə silsilə oğurluqlar törədən şəxslər aşkar edilib. Polis Şöbəsinin həyata keçirdiyi əməliyyat tədbirləri nəticəsində Taleh Novruzov, Şükür Mustafayev, Cahid İsrafilov və Vaqif Nuriyev saxlanılıblar. Onlar icarəyə götürdükləri avtomobillərlə son 9 ay ərzində bir neçə dəfə Bakıdan Şəkiyə gələrək burada oğurluq etdiklərini bildiriblər. Gecə saatlarında tövlələrə daxil olan dəstə üzvləri dəyəri 30 min manata yaxın olan 26 baş mal-qaranı oğurlayaraq ələ keçiriblər. Araşdırmalarla dəstə üzvlərinin oğurladıqları heyvanları Bərdə, Ağdaş, Göyçay və Bakı şəhərində satdıqları müəyyən olunub. Faktla bağlı cinayət işi başlanılıb, məhkəmənin qərarı ilə saxlanılanların hər biri barəsində həbs qətimkan tədbiri seçilib.

Ölkə əhəmiyyətli yollardan biri sayılan Yevlax-Zaqatala-Gürcüstan ilə dövlət sərhədi magistral yolunun Şəki-Qax və Qax-Zaqatala hissəsi uzun illərdir təmir edilmədiyindən yararsız vəziyyətə düşüb. Magitralın 78 kilometrlik təmirsiz hissəsi sürücülərə və bu yoldan hər gün istifadə etmək məcburiyyətində qalan ətrafda yaşayan sakinlərə çətinliklər yaradır. Bəs, təmir işləri aparılacaqmı? Sujetdən biləcəksiniz..

29 aprel – dünyada Beynəlxalq Rəqs Günü kimi qeyd olunur. Bu günün əsas məqsədi rəqs sənətinin müxtəlifliyini tanıtmaq, onun bəşəriyyətin ortaq dili olduğunu vurğulamaqdır... Şəkidə Beynəlxalq Rəqs Günü və Şəki şəhər Uşaq İncəsənət məktəbinin müəllimi, xareoqraf Xumar Əsədovanın 20 illik yubileyi münasibətilə "Rəqsin Xumar nağılı" adlı konsert keçirilib. Regional Mədəniyyət İdarəsi və İcra Hakimiyyətinin birgə təşkilatçılığı ilə Şəki Dövlət Dram Tatrında baş tutan konsertdə rayon rəsmiləri, mədəniyyət işçiləri, şəhid ailələri, qazilər, şəhər ictimaiyyəti iştirak edib. Konsert proqramında Xumar Əsədovaının yaradıcılığını və bu günün önəmini əks etdirən videoçarx nümayiş olunub. X.Əsədova və şagirdləri maraqlı rəqs nömrələri ilə çıxış ediblər.