Bu gün səhər saatlarında İsmayıllı-Lahıc-Dəmirçi-Şamaxı avtomobil yolunun keçdiyi Niyaldağ silsiləsində, Lahıc qəsəbəsi ərazisində növbəti dəfə torpaq uçqunu baş verib. Hündür dağlardan gələn torpaq və daşlar avtomobil yoluna tökülüb, nəqliyyat vasitələrinin hərəkəti təxminən 5 saat ərzində tamamilə dayanıb. Yolun açılması üçün əraziyə bir neçə ağır texnika və işçi qüvvəsi cəlb edilib. Sağ tərəfdəki sıldırımlı uca dağlardan və qayalardan qopub yola tökülən böyük daş parçaları və torpaq kütləsi texnikaların köməyi ilə sol tərəfdəki Girdiman çayına tərəf yönəldilib və ərazidən avtomobillərin keçidi təmin olunub. Bununla yanaşı, mütəxəsislər Lahıc və ətrafdakı kənd sakinlərinin İsmayıllı şəhərinə gediş-gəlişi üçün alternativ olaraq Dəmirçi-Şamaxı-Muğanlı-İsmayıllı yolundan istifadə etmələrini tövsiyə edir. Qeyd edək ki, son bir ayda İsmayıllı rayonuna yağan qar və yağış səbəbindən Lahıc yolunda tez-tez torpaq sürüşmələri baş verir. 

Zaqatalada yol polisləri tərəfindən dayanma-durma, parklanma qaydalarını pozan, eləcə də 2-ci cərgədə nəqliyyat vasitələrini saxlayan sürücülərin maarifləndirilməsi və barələrində qanuni tədbir görülməsi məqsədi ilə reydlər təşkil edilib. Şəhər ərazisində hərəkətin intensiv olduğu küçə və prospektlərdə keçirilən reyddə piyada səkilərində, müəyyən edilməyən ərazilərdə və avtobus dayanacaqlarında avtomobillərini park edən sürücülər aşkarlanıb. Ümumilikdə sadalanan qayda pozuntularına yol verən 20 sürücü barəsində inzibati tənbeh tədbiri görülüb.

 Heydər Əliyev mərkəzində keçirilən tədbirdə çıxış edənlər Mədəni İrsin Qorunması, İnkişafı və Bərpası üzrə Dövlət Xidmətinin və Qəbələ Regional İdarəsi gördüyü işlərdən bəhs ediblər. Qeyd olunub ki, Qəbələ regional idarəsi 14 inzibati rayonda 500 abidəni Dövlət Qeydiyyatına götürüb. 300 dən çox yeni aşkar olunmuş abidələrin mühafizəsini təmin edir. Dövr ərzində regional idarənin abidə muhafizəçiləri tərəfindən abidələrdə geniş monitorinqlər aparılıb və nəticələri barədə regional idarəyə hər ay hesabatlar təqdim olunub. Daha sonra tədbir iştirakçıları Qəbələ Regional İdarəsinin nəzarətində olan abidələrin fotolarından ibarət sərgi ilə tanış olublar. Qonaqlara abidələr barədə ətraflı məlumat verilib.Tədbir İsmayıllı rayon incəsənət ustalarının ifaları ilə başa çatıb.

Bu il qışın quraq keçməsi, yaz aylarında isə yağan qar çaylarda sel təhlükəsini artırıb. Belə ki, yağışlar mövsümünün başlaması ilə qarın əriməsi eyni ana təsadüf etdiyi üçün təhlükə yaşana bilər. Ancaq Şəki suvarma sistemləri idarəsindən bidirildi ki, görülən işlər kifayət etmir. Belə ki, çay məcralarının təmizlənməsi ilə yanaşı, bəndlərin də salınmasına ehtiyac var. Eyni zamanda qurumdan bildirildi ki, suvarma mövsümü olduğu üçün çaylardan gələn su əkin sahələrinə yönəldilir. Hazırda 39 min hektar sahənin suvarılması üçün iş aparılır. Qurumdan o da qeyd edildi ki, şəhərdaxili çaylar - Dəyirmanarxı və Qurucana çaylarında da ümumilikdə 6 min paqonametr uzunluğunda bənd salınmasına və təmir bərpa işlərinin aparılmasına böyük ehtiyac var.

 3 ay müddətində davam edən “ŞƏKİ MƏDƏNİYYƏT” festivalı 2015-ci ildən fəaliyyət göstərən “ELM” Gənclərin Sosial-İntellektual İnkişafına Dəstək İctimai Birliyinin sayca 7-ci layihəsidir. Layihə çərçivəsində məntiqi və Şəkinin mədəniyyətini əhatə edən sualların köməyi ilə gənclərin intellektual bilikləri sınanılıb. Müsabiqənin qalibi olan 31 nəfər hədiyyə və sertifikatlarla mükafatlandırılıb. “ELM” ictmai birliyinin layihələrində əsas məqsəd Azərbaycan tarixinə, mədəniyyətinə sevgisini və marağını artırmaq, həmçinin istedadlı gəncləri aşkar etmək, onların gələcək inkişafına dəstək göstərməkdir. Qeyd edək ki, ümumilikdə müsabiqələrdə 5000-ə yaxın intellektual gənc iştirak edib. 

 İsmayıllıda 24 baş inək və qoyun yanaraq tələf olub. İsmayıllı rayonunda dəhşətli yanğın hadisəsi baş verib. Hadisə rayonun Kəlbənd kənd sakini, 1954-cü il təvəllüdlü Quliyev Rəşid İsmayıl oğluna məxsus ümumi sahəsi 132 kvadratmetr olan mal-qara tövləsində baş verən yanğının söndürülməsi üçün əraziyə FHN-nin İsmayıllı və Göyçay Dövlət Yanğından Mühafizə Hissələrinin 3 avtomobili və canlı qüvvəsi cəlb olunub. Hadisə zamanı tövlə, içəridəki 17 baş qoyun və 7 baş inək, çardaqdakı 1.5 ton ot yanaraq tələf olub. Hadisə zamanı tövlənin yanındakı "QAZ 53" markalı yük maşını yanıb. Yanğınsöndürənlər alovun yaxınlıqdakı evə keçməsinin qarşısını alıb. Xəsarət alan olmayıb. Yanğının baş vermə səbəbi hələ ki, məlum deyil. Faktla bağlı araşdırma aparılır.