İsmayıllı rayonunda ötən ilin noyabr ayından cari ilin yanvar-fevral aylarınadək olan müddət ərzində 9 evdən oğurluq edilib. Polis Şöbəsinə müraciət edən zərərçəkənlər onlara məxsus evlərdən ümumi dəyəri 7000 manatdan artıq olan müxtəlif məişət əşyaları, elektrik kabelləri, su qızdırıcları və təmir-tikinti alətlərinin oğurlandığını bildiriblər. Polis əməkdaşlarının həyata keçirdiyi əməliyyat-axtarış tədbirləri nəticəsində hadisələri törətməkdə şübhəli bilinən rayon sakinləri- Rəsul Bəbirov və 2020-ci ildə törətdiyi oğurluğa görə azadlığın məhdudlaşdırılması növündə cəzaya məhkum edilərək elektron qolbaqla təchiz olunmuş Samir Əsədli tutulub. Onlar əməllərini etiraf edib və oğurladıqları əşyaları dəyərindən ucuz qiymətə rayon ərazisində ayrı-ayrı şəxslərə satdıqlarını bildiriblər.

Qaxda isə ələ keçməmək üçün oğurladıqları 10 000-ə yaxın ABŞ dollarını torpağa basdıran dostlar saxlanılıb... Belə ki, Qax rayonu Almalı kəndi ərazisində yerləşən evlərin birindən oğurluq edilib. Polis Şöbəsinə müraciət edən zərərçəkən 9300 ABŞ dolları və 4 min manat pulunun, eləcə də qızıl-zinət əşyalarının oğurlandığını bildirib. Əməliyyat-axtarış tədbirləri nəticəsində hadisəni törətməkdə şübhəli bilinən Şəki rayon sakinləri-Şahid Balliyev və əvvəllər də analoji cinayət əməlinə görə məhkum olunmuş Nicat Abdulkərimov tutularaq istintaqa təhvil veriliblər. Araşdırma zamanı müəyyən edilib ki, əvvəllər zərərçəkənin fermasında çoban işləyən Şahid Balliyev Bakıda kirayədə yaşadığı Nicat Abdulkərimovla əlbir olaraq gecə saatlarında həmin şəxsin yaşadığı ünvana daxil olublar. Pul və qızılları götürdükdən sonra Şəki rayonuna qayıdan dostlar 4 min manatı öz aralarında bölüblər, ABŞ dollarını isə bankaya qoyaraq iz itirmək məqsədilə Nicat Abdulkərimovun yaşadığı ünvanda torpağa basdırıblar. Keçirilmiş tədbirlərlə qızıl-zinət əşyaları və torpağa basdırılmış pullar onlardan maddi sübut kimi götürülüb. Şahid Balliyevin izahatı alınarkən onun yanvar ayında da həmin evdən 10 000 manat pul oğurladığı və bundan sonra Bakı şəhərinə gedərək restoranlarda xərclədiyi məlum olub. Faktlarla bağlı cinayət işi başlanılıb, istintaq aparılır.

Zaqatalanın 9 kəndinin 20 minə yaxın sakininin rayon mərkəzinə gəlmək üçün gündəlik istifadə etdikləri yol əsl təhlükə mənbəyidir. Yolun sağında və solunda olan irigövdəli çinar ağacların əksəriyyəti quruduğundan, əsasən də küləkli və yağışlı havalarda bu yoldan istifadə edən sakinlər xata-bəlasız mənzil başına çatmaq üçün yolboyu dua edirlər.  Efitrdən sonra... Küləkli havalarda həmin istiqamətdə aşan ağacları dəfələrlə çəkib göstərmişik. Maraqlıdır ki, problemin həlli ilə bağlı tədbir görmək üçün hər hansının faciənin yaşanması gözlənilir?  

 Zaqatalada 9 kəndi birləşdirən magistral yol artıq istifadəçilər üçün təhlükə mənbəyinə çevrilib. Yolun kənarında vaxtilə əkilən çinar ağacları indi yollara yox, sanki burdan keçənlərin həyatına kölgə salmağa başlayıb. Ağaclar quruduğundan bəzən küləkli hava zamanı qol-budağı qırılıb tökülür, aşaraq yolda təhlükə saçmaqla yanaşı, nəqliyyatın hərəkətinə də ciddi maneə törədir. Ekologiyanın çirkləndiyi bir vaxtda ağacları qorumaq hər birimizin borcu olsa da o ağaclar insanların həyat və fəaliyyətinə mənfi təsir göstərirsə bir tədbir görülməlidir. Sakinlərin sözlərinə görə, yağışlı, küləkli havada bu qoca çinarlar  elektrik və rabitə naqillərini də qırıb tökür, sakinləri qaranlıqda qoyur. Məsələ ilə bağlı Makov İnzibati Ərazi nümayəndəliyindən bilirilib ki, problemin birdəfəlik həlli istiqamətində artıq müvafiq addımlar atılır. Qeyd edək ki, problem təkcə sözügedən ərazidə yox, Zaqatalanın bir çox kənd daxili yollarında da müşahidə edilir.