Şəkidə Heydər Əliyev mərkəzində “Bizim Böyük Qələbəmiz” kitabının təqdimat mərasimi keçirilib. Bakı Şəhər İcra Hakimiyyəti və “Regional İnkişaf” İctimai Birliyi tərəfindən birgə hazırlanan kitab azyaşlılar üçün nəzərdə tutulub. Təqdimat mərasimində şəhər rəhbərliyi, ictimaiyyət nümayəndələri, müəllimlər, şagirdlər və könüllülər iştirak ediblər. Öncə mərasim iştirakçıları mərkəzin foyesində rəflərə düzülmüş“Bizim böyük Qələbəmiz” kitabı ilə tanış olublar, burada onlara kitab haqqında qısa məlumat verilib. Mərasim iştirakçıları, həmçinin, mərkəzin foyesində məktəblilərin əl işlərindən ibarət vətənpərvərlik mövzusunda rəsm sərgisinə baxıblar. Daha sonra tədbir mərkəzin akt zalında davam edib. Çıxış edənlər bildirib ki, kitabla tanış olan azyaşlılar Zəfər tariximizi daha yaxından öyrənmək imkanı qazanacaqlar. Sonda iştirakçılar şəhər 3 saylı Uşaq Musiqi Məktəbinin kollektivi maraqlı konsert proqramı ilə çıxış edib.

Şamaxıda su-kanalizasiya xəttinin çəkilişi üçün aparılan qazıntı zamanı Əli Kərimov küçəsinin asfalt örtüyü dağıdılıb. Aradan uzun illər keçməsinə baxmayaraq, ərazidə yolun təmiri istiqamətində heç bir iş aparılmayıb. Sakinlər yolun yağışlı və qarlı havalarda xüsusilə keçilməz olduğunu deyirlər. İri çuxurlar, çay daşları və palçıq qatı piyada və sürücüləri burdan keçmələrinə peşman edir. Yayda isə ətrafı toz dumanı bürüyür. Sakinlərin sözlərinə görə, taksi sürücüləri bir çox hallarda bu əraziyə gəlməkdən imtina edir və ya daha baha qiymətə aparırlar. Yolun təmirsiz olması təcili yardım və yanğınsöndürən maşınların da işini çətinləşdirir. Oxşar vəziyyət şəhərin bir çox daxili küçələrində yaşanır. Rayon icra hakimiyyətindən Şamaxı şəhərinin abadlaşdırılması istiqamətində tədbirlərin davam etdirildiyi, daxili küçələrin asfaltlanması probleminin də tezliklə həllini tapacağı bildirildi. Qurum rəsmisi onu da vurğuladı ki, bu ilin sonunadək Əli Kərimov küçəsinin də asfaltlanması planlaşdırılır.

Ümummilli lider Heydər Əliyevin anadan olmasının 99-cu ildönümü münasibətilə Qax şəhərində mini futbol üzrə rayon turnirinə start verilib. YAP Qax rayon təşkilatının və rayon Gənclər və İdman İdarəsinin birgə təşkilatçılığı ilə keçirilən turnirdə rayonda fəaliyyət göstərən müəssisə və təşkilatları, bələdiyyələri təmsil edən 15 komanda mübarizə aparır.Mərasimdə  çıxış edənlər ümummilli lider Heydər Əliyevin bütün sahələrlə yanaşı, idmanın inkişafına da böyük diqqət yetirdiyini bildirib, hazırda ölkəmizdə bu sahənin inkişafına göstərilən yüksək dövlət qayğısından danışıblar. Diqqətə çatdırılıb ki, turnirin keçirilməsində məqsəd Ulu Öndərin xatirəsini yad etmək, eyni zamanda, gənclərin fiziki sağlamlığını inkişaf etdirmək və idmana olan marağını artırmaqdır. Turnirə mayın 8-də yekun vurulacaq.

Oğuzun Dəymədağlı kəndinin sakinləri içməli suya həsrət qalıb. Belə ki, kəndin içməli suya olan təlabatını qarşılamaq üçün qazılan quyudan çıxan su içmək üçün yararlı deyilmiş. Üstəlik quyu da çöküb. Bir sözlə, artıq neçə ildir ki, məsələnin həll olunmadığını görən sakinlər son ümid yeri kimi Kanal S-ə üz tutub. Biz də araşdırıb çarə tapmağa çalışmışıq.

Rayon mərkəzindən 25 km məsafədə yerləşən 300 nəfərdən artıq sakini olan Dəymədağlı kəndi artıq 2 ilə yaxındır ki, susuz qalıb. Əslində kəndin su təminatının yaxşılaşdırılması məqsədi ilə 2019-cu ildə dövlət vəsaiti hesabına bir neçə arteziyan quyusu qazılıb. Lakin istisamara verilən artezianlar tezliklə  fəaliyyətini dayandırıb. Əhalinin çox ehtiyacı olan su isə ətrafı gölməçəyə çevirir. İşi müşkülə düşən kəndlilər problemlərinin həll olunması üçün döymədikləri qapı, müraciət etmədikləri qurum olmadığını ancaq məsələnin hələ də həllini tapmadığını söyləyirlər. Oğuz Suvarma sistemləri idarəsindən bildirildi ki, quyu istifadəyə verildikdən sonra uçma baş verib. Ancaq əhali bu vəziyyətdə də sudan istifadə edə bilir. İdarədən o da bildirildi ki, əhalinin içməli su ilə bağlı təlabatını ödəmək üçün yaxın günlərdə yeni quyuların qazılması planlaşdırılır. Bu məqsədlə əraziyə mütəxəssislər cəlb ediləcək. 

Ötən həftə sonu Kanal S Xəbərdə Şəkinin küçələrində piyada xətlərinin silinməsi, bəzi yollarda ümumiyyətlə olmaması ilə bağlı material yayımlamışdıq. Artıq bu gündən etibarən Şəkinin küçə və prospektlərində xətləmə işlərinə start verilib. Xətlərin silindiyi və ya tanınmaz halda olduğu küçələrdə yeni xətlər çəkilir, nişanlar bərpa edilir. Yolların nişanlanması ilə məşğul olan Şəki 4 saylı Siqnal idarəsindən bildirilib ki, küçələrdə xətləmə işlərinin yubanmasına səbəb qurumda rəhbərliyin dəyişməsidir. Siqnal idarəsinin məlumatına görə, piyada keçidlərinə ehtiyac duyulan küçələrdə  nişanlama xətlərinin aparılması üçün vətəndaşlar ilk öncə Şəki Baş DYP Bölməsinə müracəit etməlidirlər.  Bölmə razılıq verdikdən sonra xətləmə işləri Siqnal idarəsi tərəfindən həyata keçirilir.  

Ağsuda bir neçə rayonda mağazalardan oğurluq edən dəstə üzvləri tutulub. Hacısəmədli və Muradlı kəndlərində yerləşən iki mağazanın sahibi onlara məxsus obyektlərdən ümumi dəyəri 3 000 manat olan tütün məmulatları, spirtli içkilər, qadın geyimləri və ərzaq məhsullarının oğurlanması barədə polisə məlumat veriblər. Rayon Polis Şöbəsi əməkdaşları tərəfindən oğurluqları törətməkdə şübhəli bilinən dəstə üzvləri, əvvəllər də məhkum olunmuş -Ağsu rayon sakini Sərxan Hüseynov, Şəki şəhər sakinləri Nicat Quliyev və Elvin Dursunəliyev, Balakən rayon sakini Tofiq Hacıyev, eləcə də Ağdaş şəhər sakini Rövşən Qasımov tutulublar. Onlar cinayət əməllərini etiraf ediblər və birgə oğurladıqlarını sataraq öz aralarında böldüklərini bildiriblər. Aparılan araşdırmalar zamanı saxlanılan şəxslərin Ağdaş rayonu ərazisində yerləşən mağazadan da oğurluq etdikləri müəyyən edilib. Faktlarla bağlı cinayət işi başlanılıb, dəstə üzvlərinin digər rayonlarda da analoji cinayətlər törətdikləri istisna olunmur. Əməliyyat-istintaq tədbirləri davam etdirilir.