Bu il kümçülərə əvəzsiz olaraq 11 500 qutu ipəkqurdu sənaye toxumunun paylanması nəzərdə tutulur. Barama mövsümü ərəfəsində artıq bütün hazırlıq işləri tam başa çatıb. Qax Damazlıq İpəkçilik Stansiyasında hibrid ipəkqurdu toxumlarının kümçülərə paylanmasına həsr olunmuş tədbirdə kənd təsərrüfatı naziri Məcnun Məmmədov bildirib ki, kümxanalar aqrozootexniki tələblərə uyğun hazırlanıb, dezinfeksiya işləri həyata keçirilib, kümçülər təlimlərə cəlb olunublar. Baramaçılığın və ipəkçiliyin Azərbaycanda qədim ənənələrinin olduğunu deyən nazir bu sahənin inkişafı üçün dövlət tərəfindən davamlı dəstək tədbirlərinin həyata keçirildiyini vurğulayıb. Qeyd olunub ki, ölkədə baramaçılıq və ipəkçiliyin inkişafına dövlət dəstəyi kümçülərin bu sahəyə marağını ildən-ilə artırır. Kümçülərlə imzalanan müqaviləyə əsasən, istehsal olunmuş yaş barama müvafiq qurum tərəfindən 5 manata təhvil alınacaq, dövlət isə istehsal olunan hər kiloqram yaş baramaya görə kümçülərə 6 manat subsidiya ödəyəcək. Sonra yaş barama istehsal olunan rayonların Dövlət Aqrar İnkişaf Mərkəzlərinin rəhbərləri ilə görüş keçirilib, onlarla yeni başlayan mövsümdə görüləcək işlər barədə fikir mübadiləsi aparılıb, tövsiyə və tapşırıqlar verilib. Səfər çərçivəsində nazir Qax Dövlət Aqrar İnkişaf Mərkəzinin binası ilə tanış olub, DAİM-in kollektivi ilə görüşüb, rayonda fəaliyyət göstərən təsərrüfatlara baş çəkib. Həmçinin, Şəki ərazisində payızlıq əkin sahələrinin vəziyyəti ilə yerində tanış olub, quraqlığın taxıl sahələrinə vurduğu zərər yerində dəyərləndirilib.

Zaqatalada 3 yaşlı uşaq bədbəxt hadisə nəticəsində ölüb. Hadisə rayonun Əliabad qəsəbəsində baş verib. Qəsəbə sakini 2020-ci il təvəllüdlü David Elməddin oğlu Bəşirovun yaşadığı ünvanda tənəffüs yolunda alça qalıb. Ağır vəziyyətdə xəstəxanaya aparılan 3 yaşlı D.Bəşirov yolda nəfəs çatışmamazlığından dünyasını dəyişib. Faktla bağlı araşdırma aparılır.

Əslində tibb məntəqəsi heç yoxdur desək, həqiqəti tam da əks etdirməz. Olmağına, sözdə məntəqə var. Amma həm şəraitinin yoxluğu, həm də sakinlərə uzaq olması imkanları əlverişsiz edir. Məntəqə keçmiş kolxoz binasının tərkibində yerləşir.Binada məntəqə ilə yanaşı bir neçə idarə də fəaliyyət göstərir. Nəzərə alsaq ki, məntəqələrə xəstə, səhhətində problem olan insanlar müraciət edir, bu zaman yoluxucu xəstəliyi olan şəxs digər idarə əməkdaşları üçün də təhlükə törədir. Problem sadəcə məntəqə binasının vəziyyəti ilə də bitmir. Tibb məntəqələrinin əksəriyyətində heç bir müasir avadanlıq, eləcə də dərman vasitəsi yoxdur. Odur ki, istər ilkin tibbi yardım tədbirlərinin göstərilməsi, istərsə də ən sıradan bir dərman preparatlarını ala bilmək üçün azı 20-25 km yol qət edib ya rayon mərkəzinə, ya da Qəbələyə getməli olur sakinlər. Bu məsafə şəxsi avtomobili olanlara elə də baha-başa gəlmir, amma gediş-gəliş üçün taksidən istifadə edənlər dərman almaq üçün əməlli başlı xərcə girir. Mövcud vəziyyət İstisu,Çayqovuşan,və Sumağanllı kəndlərində də yaşanır.İstisu kəndindəki tibb məntəqəsi baxımsızlıqdan qəzalı vəziyyətdədir.Bu da azmış kimi məntəqənin yerləşdiyi binada antisanitar vəziyyət hökm sürür. Sakinlər tibb məntəqələrinin bərpasını, ən kritik vəziyyətdə ilkin tibbi yardım almaları üçün kömək istəyirlər. Məsələ ilə bağlı TƏBİB-ə ünvadığımız sorğu isə cavabsız qalıb.

130 minə yaxın əhalinin yaşadığı Zaqatala ərazisindən 7 çay axır. Əsas çaylar Qanıx, Katex, Tala, Muxax çayları olmaqla, Qanıx çayı hövzəsinə aiddir. Uzunluğu 56 kilometr olan Muxax çayı Qanıx çayından sonra rayon ərazisindən axan ən uzun çaydır. Adını isə rayonun ən böyük kəndlərindən olan, 10 minə yaxın əhalinin yaşadığı Muxax kəndindən alıb. Bir neçə il öncə bu çayın adını bildirən “ Muxax çayı “ lövhəsi “Böyükçay” olaraq dəyişdirilib. Çayın adının dəyişdirilməsi isə yerli sakinlərin narazılığına səbəb olub. Onlar əsassız dəyişdirilən çay adının geri qaytarılmasını istəyirlər. Azərbaycan ensiklopediyası və Azərbaycan toponimləri kitablarında da çayın adı Muxax çay kimi qeyd edilib. Məsələ ilə bağlı Avtomobil Yolları Dövlət Agentliyinə müraciət ettdik. Qurumdan bildirildi ki, hər hansı bir ərazidə müəyyən təmir- bərpa işləri görüldükdən sonra müvafiq adların yazıldığı lövhələrin vurulması təsdiqlənmiş siyahı əsasında həyata keçirilir. Qeyd edək ki, ölkə ərazisində hər hansı toponimin dəyişdirilməsi üçün Milli Məclisin qərarı olmalıdır. Ümid edirik ki, sakinlərin bu narazılığı tezliklə öz həllini tapacaq.

Qobustanda avtomobil çökəkliyə aşıb. Bakı-Şamaxı-Yevlax avtomobil yolunun Qobustan rayonu Cəngi qəsəbəsindən keçən hissəsində Abşeron rayonu, Xırdalan şəhər sakini 45 yaşlı Fərman Həsənovun idarə etdiyi \"Mercedes Benz 240\" markalı avtomobil rayon istiqamətində hərəkətdə olarkən yoldan çıxaraq çökəkliyə aşıb. Nəticədə sürücü Fərman Həsənov aldığı xəsarətlərdən ölüb. Faktla bağlı araşdırma aparılır.