Şəkidə avtomat və tapançanı 3200 manata satmaq istəyən şəxs saxlanılıb. Sarıca Polis Bölməsi əməkdaşlarının keçirdiyi əməliyyat nəticəsində Turan qəsəbə sakini, əvvəllər də dəfələrlə oğurluq cinayətlərinə görə məhkum olunmuş Sahib Yaqubov odlu silahı satmaq məqsədilə aparan zaman saxlanılıb. Onun üzərindən atəşə yararlı “Makarov” markalı tapança, sərnişin qismində olduğu taksidən isə ona məxsus bağlamada gizlətdiyi “Kalaşnikov” avtomatı, eləcə də həmin silahlara məxsus daraqlar, 17 ədəd patron və süngü-bıçaq aşkar edilib. Yaqubov ifadəsində silahları bir müddət əvvəl tapdığını və 3200 manata satmaq məqsədilə Mingəçevir şəhərinə aparmaq istədiyini bildirib. Faktla bağlı Şəki Şəhər Rayon Polis Şöbəsində cinayət işi başlanılıb. Məhkəmənin qərarı ilə Sahib Yaqubov barəsində həbs-qətimkan tədbiri seçilib.

Şəkidə səhər saatlarında zəncirvari yol qəza hadisəsi olub. Hadisə Şəki-Qax- Zaqatala avtomobil yolunun Qoxmuq kəndi ilə Şəki şəhərini birləşdirən körpü üzərində baş verib. Qəza nəticəsində xəsarət alan olmasa da 4-ü ciddi olmaqla 8-ə yaxın avtomobilə ziyan dəyib. Hadisə şahidlərinin sözlərinə görə , qəzaya səbəb körpününü yol örtüyünün buz bağlaması olub. Faktla bağlı araşdırma aparılır.

Şəkinin Baltalı kəndində iki kənd sakininə məxsus tövlədə yanğın olub. Hadisə yerinə Fövləladə Hallar Nazirliyinin yanğından mühafizə xidmətinin əməkdaşları cəlb olunub. Yanğın nəticəsində 84 yaşlı Fikrət Cəlilova məxsus ümumi sahəsi 180 kvadratmetr tövlənin yanar konstrukasiyaları, çardağına yığılmış 6 ton ot bağlaması, 2 ton dənli bitki – vələmir yanıb. Həmçinin yanğının baş verdiyi tövləyə bitişik olan 57 yaşlı Sənəm Quliyevaya məxsus ümumi sahəsi 120 kvadratmetr olan tövlənin dam örtüyünün yanar konstruksiyaları 60 kvadratmetr sahədə və çardağına yığılmış 3 ton ot bağlamasının 1 tonu da yanıb. Yanğından tövlənin və ot bağlamalarının qalan hissəsi mühafizə olunub. Hadisə nəticəsində xəsarət alan olmayıb, hadisənin qısaqapanma nəticəsində baş verdiyi ehtimal olunur.

Şəki Dövlət Dram Teatrında “Azərbaycan Musiqi Xəzinəsində Klassik və Müasir Qarmon İfaçılığı” adlı qarmon ifaçılarının konserti keçirilib. Konsert proqramında ölkənin tanınmış qarmon ifaçıları, incəsənət və ictimaiyyət nümayəndələri iştirak edib. Konsertdən öncə çıxış edənlər qarmon ifaçılığının Azərbaycan incəsənətindəki yerindən və tarixindən danışıblar. Bildirilib ki, qarmon ifaçılığı sənəti musiqimizin zəngin çalarlarını özündə əks etdirir. Daha sonra konsert proqramına start verilib. Qarmon ifaçılarının bir-birindən gözəl ifaları tamaşaçılar tərəfindən alqışlarla qarşılanıb.

Şamaxının Mərzəndiyə kəndində yeni tibb məntəqəsinin açılması kənd sakinləri üçün əsl hədiyyə idi. Artıq sağlamlıqlarının daha əmin əllərdə olduğunu düşünürdülər. Lakin onlar heç gözləmədikləri bir nəticə ilə qarşılaşıblar. Kənd sakinləri müasir standartlara uyğun tikilmiş məntəqənin qapılarının hələ də onların üzünə açılmasını gözləyirlər.

Şamaxının Mərzəndiyə kənd tibb məntəqəsi bir neçə il öncə yenidən qurulub. Ancaq kənd sakinlərinin böyük həvəslə istifadəyə veriləcəyini gözlədiyi səhiyyə ocağının qapısı hələ də açılmayıb. Xəstəsi olanlar ən xırda narahatlıqda belə şəhərə qədər getməyə məcbur qalırlar. Kəndin şəhərdən uzaq olması isə həm xəstəni çatdırmaq baxımından, həm də maddi baxımdan sakinlərə böyük problem yaradır.

Sakinlər aidiyyatı qurumlara müraciətində kadr çatışmazlığığnın əsas gətirildiyini bildirirlər. Ancaq elə kəndin özündə məntəqədə çalışa biləcək tibbi personalın da olduğunu iddia edirlər. Məsələ ilə bağlı TƏBİB-lə əlaqə saxladıq. Qurumdan sorğumuza cavab olaraq bildirildi ki, Mərzəndiyə Tibb Məntəqəsi Sabir qəsəbə Ailə Sağlamlıq Mərkəzinə tabedir.

Burada 2 ailə həkimi 7 tibb bacısı və 1 mama çalışır. Mərzəndiyyə tibb məntəqəsində həkim ştatı nəzərdə tutulmayıb. Burada tibb bacısı ştatına işə qəbul üçün isə elan verilsə də, heç bir müraciət daxil olmayıb.