DİM martın 10-da tam orta təhsil səviyyəsi üzrə buraxılış imtahanı keçirib. İmtahanlarda 53 mindən çox şagird biliyini sınayıb. İmtahan keçirilən şəhər və rayonlarda ümumilikdə 236 imtahan binası, 4043 imtahan zalı ayrılıb. İmtahanlar işğaldan azad olunmuş Laçın, Füzuli və Zəngilan rayonlarında da baş tutub. İlkin məlumatlara əsasən, 3 nəfərdə mobil telefon,1 nəfərdə isə ağıllı saat aşkarlandığı üçün imtahandan xaric edilib. Qeyd olunan hallarla bağlı araşdırma aparılır. Əməkdaşlarımız imtahan prosesini Zaqatalada izləyiblər. Buraxılış imtahanları Zaqatala şəhər 1, 2, 3 nömrəli və Qazangül qəsəbə tam orta məktəblərdə, Zərifə Əliyeva adına Texniki təmayüllü liseydə təşkil olunub. Zaqatalada ümumilikdə 1196 nəfərin iştirakının nəzərdə tutulduğu imtahanların idarə olunmasına 16 imtahan rəhbəri və 113 nəzarətçi cəlb edilib. İmtahanların keçirilməsi üçün 96 zal ayrılıb. İmtahanda istifadə edilmiş test tapşırıqlarının cavabları imtahandan dərhal sonra Mərkəzin saytına yerləşdirilib. Bu gündən etibarən isə DİM-də imtahan protokolları və cavab vərəqlərinin emalına başlanılacaq. İmtahanlarda istifadə olunan yazılı cavab tələb edən açıq tipli tapşırıqların yoxlanılması vaxt tələb etdiyindən nəticələrin yaxın 4 həftə ərzində elan olunması nəzərdə tutulur. Xatırladaq ki, imtahan başa çatdıqdan sonra iştirakçılara sual kitabçalarını özləri ilə aparmağa icazə verilib.

Şəkidə Regional Perinatal Mərkəzdə ölüm faktı qeydə alınıb. Qəbələ rayonu Mıxlıqovaq kənd sakini 25 yaşlı Qalibə Cavadova fevral ayının 13-ündə dünyaya uşaq gətirib. Bətndaxili infeksiya ilə erkən doğulan körpə küvəzə yerləşdirilib. Zəruri tibbi xidmətlər göstərilməsinə baxmayaraq, 09.03.2024-cü il tarixində saat 11:45 radələrində tənəffüs çatışmazlığı, dəqiqləşdirilməmiş anadangəlmə pnevmoniya, bətndaxili infeksiya, beyin ödəmi, perinatal hemotoloji pozuntular diaqnozu ilə ölüm faktı qeydə alınıb. Faktla bağlı araşdırma aparılır.

Hadisə bu gün günorta saatlarında rayonun Kiçik Dəhnə kəndində qeydə alınıb. Kənd sakini Əflatun Talıbova məxsus 2 otaqdan ibarət evdə baş verən yanğının söndürülməsi üçün əraziyə Fövqaladə Hallar Nazirliyinin yanğınsöndürənləri cəlb edilib. Yanğın nəticəsində evin yanar konstruksiyaları və evə bitişik talvarın yanar konstruksiyaları yanıb. Yaxınlıqdakı digər tikililər yanğından mühafizə olunub. Faktla bağlı araşdırma aparılır.

Təbiət hadisəsi rayonun Dağ Göylər kəndi ərazisində qeydə alınıb. Vulkan püskürməsi zamanı yerin altından xaric olan palçıq təxminən 10 metr hündürlüyə qalxaraq 1 hektara yaxın əraziyə yayılıb. Belə vulkanlar üçün xarakterik olan alov sütunu budəfəki püskürmə zamanı qeydə alınmayıb.Yerli sakinlər püskürmədən əvvəl ərazidə güclü uğultu səsi eşidiblər.

Sakinlərin sözlərinə görə, Məlikçobanlı palçıq vulkanında adətən ildə bir neçə püskürmə qeydə alınır. Lakin son vulkan püskürməsi daha güclü olub. Hazırda püskürmə dayansa da, ocaqda qaynamalar davam edir. Vulkanın püskürdüyü ərazidən bir qədər aralıda sakinlərin əkin sahələri yerləşir.

Sakinlər sonuncu dəfə bu vulkanın 1986-cı ildə güclü püskürdüyünü və həmin vaxt örüş yeri kimi istifadə olunan ərazidə mal-qaranın palçıq qatının altında qaldığını bildirirlər. Şamaxıda yerləşən digər vulkanların da aktivləşməsi və güclü püskürmənin ola biləcəyi ilə bağlı iddialar isə ərazidə geoloqların araşdırmasından sonra öz təsdiqini tapacaq.

İsmayıllıda qanunsuz kömür quyuları aşkarlanıb. Ekoloji mühitin qorunması məqsədilə İsmayıllı Rayon Polis Şöbəsinin və 6 saylı Regional Ekologiya və Təbii Sərvətlər İdarəsi əməkdaşlarının birgə keçirdiyi tədbirlər zamanı rayonun Qalınçaq kəndi ərazisində qanunsuz yolla ağac kömürü istehsal edən quyular aşkarlanıb.

Araşdırma zamanı qanunsuz kömür istehsal edən şəxslərin kənd sakinləri Şaiq Ziyadov və Gülbala Ziyadov olduqları müəyyən edilib. Onların barəsində İnzibati Xətalar Məcəlləsinin müvafiq maddəsi ilə protokol tərtib olunub. Qanunamüvafiq tədbirlər görülüb, kömür quyuları isə ləğv olunub.