2024-2025-ci illər üçün BMT-nin Gənclərdən ibarət Məşvərət Şurasına Azərbaycandan üzv seçilən 17 parlaq gəncdən biri Şəki şəhər Kimya-Biologiya Təmayüllü Liseyin 11-ci sinif şagirdi Dəniz Məmmədzadədir. O, üzvlük müddətində BMT tərəfindən regional və qlobal səviyyədə təşkil edilən görüş və tədbirlərdə iştirak edəcək. Məşvərət şurasının üzvü kimi BMT-nin Azərbaycan gəncləri ilə əməkdaşlığı, dialoqu, tərəfdaşlığının genişləndirilməsi istiqamətində məsləhətlər verəcək.

Dəniz Məmmədzadə indiyədək bir çox respublika və beynəlxalq fənn olimpiadalarının iştirakçısı olub və müxtəlif medallar əldə edib. Həmçinin "Sabahın alimləri" layihəsinin 2023- və 2024-cü illlərdə finalisti, "Fibonaçi", "Kim,nə,harda,nə zaman?" intellektual yarışlarının da qalibidir. Dəniz qazandığı uğurların sirrini əzmli, intizamlı olmaqda görür.

Nüfuzlu universitetlərdən dəvət alan Dənizin arzusu isə Harvard universitetində biomedikal mühəndislik ixtisasına yiyələnməklə insanlığa faydalı olmaqdır. Biz də ona bu yolda uğur arzu edirik.

İsmayıllıda ağır yol qəzası olub. Rayonun Qurbanəfəndi kəndi ərazisində “SHACMAN” və “İSUZU” markalı yük avtomobillərinin toqquşması nəticəsində sürücülər deformasiyaya uğramış avtomobillərdə sıxılmış vəziyyətdə qalıb.

Hadisə yerinə gələn yanğınsöndürən-xilasedicilər xüsusi xilasetmə vasitələrindən istifadə olunmaqla avtomobillərdə sıxılmış vəziyyətdə qalan və müxtəlif bədən xəsarətləri alan sürücüləri xilas edərək təcili tibbi yardım briqadasına təhvil verib.

62 yaşlı Ağdaş rayon sakini və 47 yaşlı Ucar rayon sakini İsmayıllı Rayon Mərkəzi Xəstəxanasının TTTYS-nın briqadası tərəfindən TTTY bölməsinə gətirilib. Həkimlər və tibbi heyət tərəfindən onlara zəruri tibbi yardım göstərilib. Xəsarət alanlardan birinin vəziyyəti ağır, digərinin isə orta-ağır qiymətləndirilir. Faktla bağlı araşdırma aparılır.

Şəki Şəhər Uşaq İncəsənət Məktəbində xalq artisti, bəstəkar Süleyman Ələsgərovun 100 illik yubileyi ilə bağlı konsert proqramı təşkil edilib. Tədbirdə çıxış edənlər dahi bəstəkarın yaradıcılığından və Azərbaycan musiqisinə gətirdiyi yeniliklərdən danışıblar. Rəsmi hissədən sonra baş tutan konsert proqramında məktəbin gənc yetirmələrinin ifasında Süleyman Ələsgərovun "Vətənimdir", "Rəqs tokkata", "Sözsüz mahnıları", "Ölməz sərkərdə", "Xəyala dalarkən" və digər bəstələri səsləndirilib. Konsert proqramı tamaşaçılar tərəfindən rəğbətlə qarşılanıb.

Zaqatala Polisi qaçaqmalçılıq yolu ilə ölkəyə göndərilən külli miqdarda narkotik vasitənin və psixotrop tərkibli həblərin qanunsuz dövriyyəyə buraxılmasının qarşısını alıb.

Əməliyyat zamanı Gəncə şəhər sakini Mövsüm İsgəndərovun çantasından 2 kiloqrama yaxın marixuana, 20 ədəd metadon həbi, 34 qram tiryək, 22 qram metamfetamin və heroin aşkar edilib. Onun həmin narkotik vasitələri sosial şəbəkədə tanış olduğu iranlı narkotacirdən onlayn yolla aldığı və həmin şəxsin göstərişi ilə Gəncə şəhərinə apararaq orada satmaq istəməsi müəyyən edilib.

Mövsüm İsgəndərov əvvəlcədən fotoşəkillər vasitəsilə ona göndərilən Zaqatala rayonundakı ünvandan narkotik vasitələri götürüb getmək istəyərkən polis əməkdaşları tərəfindən yaxalanaraq istintaqa təhvil verilib. Faktla bağlı cinayət işi başlanıb.