Yaz fəsli gələr-gəlməz bazarlar və bir çox iri marketlərin piştaxtalarında mövsümündən tez yetişən meyvələr yer alıb. Xüsusilə də bu meyvələr sırasında daha çox gözə çarpan çiyələkdir. Özü də öyrəşdiyimiz çiyələklərdən dəfələrlə böyük olanlar. Satıcılar da deyir ki, Anjelika adlandırılan bu sorta tələbat çoxdu.

Mürəbbəlik hesab olunan xırda, yəni "Viktoriya" adlandırılan çiyələklər daha çox tövsiyyə olunsa da, əksəriyyət "Anjelika" növünə üstünlük verir. Bu giləmeyvələr isə istixanalarda yetişdirilir. Belə meyvələrin artıq istifadəsi zəhərlənmələrə səbəb ola bilər. Son bir ayda Zaqatalada zəhərlənmə diaqnozu ilə xəstəxanalara müraciət edənlərin sayındakı artım da bunu deməyə əsas verir.

Həkimlər də öz növbəsində mövsümündən əvvəl xüsusi şəraitdə yetişdirilən meyvə və tərəvəzlərin zəhərlənmə hallarına yol açdığını təsdiqləyir. Mütəxəssislər də zəhərlənmə saylarının artmasının əbəs yerə olmadığını bildirirlər.

Belə ki, onların sözlərinə görə bu cür meyvələr genetik modifikasiya olunub və kimyəvi maddələr vurularaq yetişdirilib. Qeyd edək ki, mövsümündə yeyilən çiyələk immuniteti gücləndirir, qaraciyər problemlərinə yaxşı təsir edir. Hətta xərçəngə qarşı qoruyucu hesab olunur. Odur ki, yediyiniz məhsulların mənşəyinə, yetişdirilmə və ən əsası da saxlanma şəraitinə diqqət yetirməklə özünüzü və sevdiklərinizi çox böyük bəlalardan qoruya bilərsiniz.

İsmayıllıda yağan güclü yağıntılardan sonra Lahıc-Dəmirçi avtomobil yolunun sürüşmə zonalarında aktivlik müşahidə olunub və çökmələr əmələ gəlib. Təxminən 40 metr məsafədə asfalt qatı sıradan çıxıb və yararsız hala düşüb.

Avtomobillər yolun bir hisəsi ilə hərəkət edirlər. Sürücülər isə bunun daha da təhlükəli ola biləcəyindən narahatdırlar. Məsələ ilə bağlı Avtomobil Yolları Dövlət Agentliyi bildirilib ki, problemdən xəbərdardırlar. Əraziyə baxış keçirilib və lazımi tədbirlərin görülməsi istiqamətində işlərə başlanılacaq.

Şəki Dövlət Dram Teatrında görkəmli alman ədibi Bertolt Brextin “Kuraj ana və uşaqları” pyesi əsasında səhnələşdirilmiş eyniadlı tamaşaya ictimai baxış olub. Pyesin əsas qəhrəmanı Kuraj ana müharibə zamanı övladlarını itirsə də, həyata olan baxışını dəyişmir. Bütün müharibələrdə itkilər olmasına rəğmən, əsərdə Kuraj ananın simasında insanlığın mahiyyəti, müharibədə qazananların əsl siması əks olunur.

Tamaşanın quruluşçu rejissoru - teatrın baş rejissoru, Əməkdar incəsənət xadimi Mirbala Səlimli, quruluşçu rəssamı Mustafa Mustafayev, geyim üzrə rəssamı Sahib Əhmədov, bəstəkarı Firudin Allahverdidir.Tamaşada rolları Əməkdar artistlər Xanlar Həşimzadə, Əbülfət Salahov, Rəhim Qocayev, aktyorlar Lalə Məmməd, Arzu Mustafayeva, Elvin Mabudov, Rəsul Məmmədrəhimov, Nərmin Abbasova, Aytac İsmayılzadə, Pərviz İsmayılov, Xəyal Salahov, İlkin Rüstəmov və başqaları ifa ediblər. Səhnə əsəsri tamaşaçılar tərəfindən alqışlarla qarşılanıb.

Şəkidə milli peşəkar teatrın yaranmasının 145 ili çərçivəsində il ərzində görkəmli dramaturqların əsərləri tamaşaya qoyulacaq. Şəkidə milli peşəkar teatrın yaradılmasının145 illiyi münasibətilə IV Şəki Beynəlxalq Teatr Festivalı da keçiriləcək.

İsmayıllıda Milli Kulinariya Assosiasiyasının təşkilatçılığı ilə “Qərbi Azərbaycanın şirin inciləri” qrant layihəsi çərçivəsində Gənc Kulinarların VI Respublika Çempionatının birinci mərhələsi keçirilib. Çempionatın keçirilməsində məqsəd Qərbi Azərbaycanın mətbəx vasitəsiylə tanıdılması, mədəniyyətimizin ən vacib parçasının – Qərbi Azərbaycan bölgə mətbəximizin assimilyasiyadan qorunmasına xidmət etməkdir. Müsabiqədən əvvəl Qərbi Azərbaycan şirniyyatların hazırlanma texnologiyası,tarixi, etnoqrafiyası, və s. haqqında ustad dərsləri keçilib. Həmçinin ilk dəfə olaraq Qida Foroqraflarının yarışı da baş tutub. Qeyd edək ki, İsmayıllı Dövlət Peşə Təhsil Mərkəzində təhsil alan tələbələr çempionatın ikinci mərhələsinə vəsiqə qazanıblar.