İsmayıllıda 3 ailənin yaşadığı mənzil yanaraq külə dönüb. Hadisə rayonun Qalınçaq kəndində qeydə alınıb. 5 otaqlı fərdi yaşayış evində baş verən yanğın zamanı ev sahibləri 65 yaşlı Bəhmən Bayramov və 55 yaşlı Nəzakət Bayramova xəsarət alıblar. Bundan başqa, yanğın nəticəsində xırdabuynuzlu ev heyvanları və toyuq cücə də tələf olub.

Hadisə yerinə FHN-nin İsmayıllı rayon Dövlət Yanğından Mühafizə Hissəsinin canlı qüvvəsi və texnikası cəlb olunub. Yanğının ətraf ərazilərə keçməsinin qarşısı alınıb. Hazırda hadisənin hansı səbəbdən baş verməsi araşdırılır.

Şəki “İpək Yolu” XIII Beynəlxalq Musiqi Festivalının sonuncu günündə tamaşaçılara TÜRKSOY ölkələri sənətçilərinin və Türkiyənin “İnegöl” Xalq rəqsləri qrupunun konserti təqdim olunub. Şəkidəki Heydər Əliyev Mərkəzində keçirilən konsertdə festivalın təşkilatçı qurumlarının rəsmiləri, tədbirin qonaqları, eləcə də musiqisevərlər iştirak ediblər. Konsert zamanı rəqs qrupunun təqdim etdiyi bir-birindən maraqlı, oynaq, şux roman, horon və halay rəqsləri, həmçinin Qazaxıstanın Xalq artisti, beynəlxalq festivalların qalibi Baxtiyar Taylakbayev və həmin ölkənin Mədəniyyət xadimi Lara Rısbayın ifa etdikləri qazax, türk və Azərbaycan mahnıları tamaşaçılar tərəfindən maraqla qarşılanıb.

Sonda təşkilatçılar adından “İnegöl” Xalq rəqsləri qrupuna və sənətçilərə festivalın rəmzi simvolu, həmçinin TÜRKSOY-un xatirə hədiyyələri təqdim olunub. Şəki “İpək Yolu” XIII Beynəlxalq Musiqi Festivalının Final gecəsində isə Fikrət Əmirov adına Dövlət Mahnı və Rəqs Ansamblının, həmçinin Azərbaycan Dövlət Xalq Çalğı Alətləri Orkestrinin üzvləri çıxış ediblər.

Yay teatrında kçeirilən konsert Azərbaycan musiqi sənətinin görkəmli xadimləri, bəstəkarlar Süleyman Ələsgərovun və Şəfiqə Axundovanın 100 illik yubileyinə həsr edilib. Xalq artisti Ağaverdi Paşayevin rəhbərlik etdiyi orkestrin üzvləri Azərbaycan bəstəkarlarının əsərlərini və xalq mahnılarını ifa ediblər. Bağlanış mərasiminin sonunda festivalın təşkilatçıları və tərəfdaşları “İpək Yolu” Beynəlxalq Musiqi Festivalının simvolu və fəxri fərmanlarla mükafatlandırılıblar.

Şamaxının Qəleybuğurd kəndində də torpaq sürüşmələri baş verib. Kənd sakinləri təlaş içindədir.

Son günlər yağan aramsız yağışlar nəticəsində Şamaxının Qəleybuğurd kəndində torpaq sürüşməsi aktivləşib. Selin ardınca gələn torpaq kütləsi kəndin yaşayış olan hissəsində böyük təhlükə yaranıb. Bəzi ərazilərdə uçqunlar olub. Sakinlər deyir ki, vaxtında tədbir görülməzsə evlərinin torpaq altında qalacağından narahatdır.

Mövcud vəziyyət yollara da təsirsiz ötüşməyib. Sakinlərin istifadə etdiyi kənddaxili yolda iri çatlar, çökmələr yaranıb, hərəkət çətinləşib.

Məsələ ilə bağlı Qəleybuğurd kənd bələdiyyəsindən isə bildirildi ki, aidiyyəti orqanlara məlumat verilib. Əraziyə baxış keçirilib və qısa zaman ərzində problemin aradan qaldırılması gözlənilir.

Qədim sənət və mədəniyyət mərkəzlərindən olan Şəkidə “İpək Yolu” XIII Beynəlxalq Musiqi Festivalı start götürüb. Yuxarı Karvansarayda keçirilən festivalın ilk tədbirində Rusiya Federasiyası Tatarıstan Respublikasının paytaxtı Kazan şəhərindən gələn bayan ifaçılarının çıxışı maraqla qarşılanıb.

Axşam saatlarında isə Şəki “İpək Yolu” XIII Beynəlxalq Musiqi Festivalının təntənəli açılış mərasimi keçiriləcək. Mədəniyyət Nazirliyi, Azərbaycan Bəstəkarlar İttifaqı və Şəki Şəhər İcra Hakimiyyətinin birgə təşkilatçılığı ilə reallaşan musiqi festivalın iyulun 7-dək davam edəcək və bir sıra ölkələrin, eləcə də Azərbaycanın musiqi kollektivləri iştirak edəcəklər.