Şəkidə xəsarətlə nəticələnən yol qəzası baş verib. Hadisə günorta saatlarında Şəki-Oğuz avtomobil yolunun Şəkinin Oraban kəndi ərazisindən keçən hissəsində qeydə alınıb. Belə ki, “Hyundai” markalı avtomobilin sürücüsü, Bakı şəhər sakini Teymur Əliyevin idarəetməni itirməsi nəticəsində nəqliyyat vasitəsi yoldan çıxaraq aşıb. Nəticədə avtomobildə olan sərnişin, 40 yaşlı Günay Baxşəliyeva müxtəlif dərəcəli bədən xəsarətləri alıb. O, Şəki Rayon Mərkəzi Xəstəxanasına yerləşdirilib. Faktla bağlı araşdırma aparılır.

Şəkidə Vətən müharibəsi şəhidi Səbuhi İsgəndərlinin xatirəsinə həsr olunmuş “Kanal S” və “ARB” televiziyalarının birgə hazırladığı “Yaralı çinar” sənədli filminin təqdimat mərasimi keçirilib. Mərasimdə şəhid ailələri, rayon rəsmiləri və ictimaiyyət nümayəndələri iştirak edib.

Çıxışlarda filmin ərsəyə gəlməsində əməyi olanlara təşəkkür edilib, vurğulanlb ki, bu cür filmlərin hazırlanması və yayılması şəhidlərimizin tanıdılmasında müstəsna rola malikdir. Daha sonra Vətən müharibəsində qəhrəmancasına şəhid olan Səbuhi İsgəndərliyə həsr olunmuş “Yaralı çinar” filminə baxış keçirilib. Ardınca tədbir rayon mədəniyyət işçilərinin və şagirdlərin hazırladığı ədəbi-bədii kompozisiya ilə davam edib.

Qeyd edək ki, Səbuhi İsgəndərli Zəngilan rayonu istiqamətində gedən şiddətli döyüşlərdə şəhadətə yüksəlib. O, ölümündən sonra "Vətən uğrunda”, “İgidliyə görə” və “Zəngilanın azad olunmasına görə” medalları ilə təltif edilib.

Bir müddət öncə yağan yağışlar Qəbələnin Tikanlı və Uludaş kəndlərində sel təhlükəsini artırıb. Dağ ətəyində yerləşən hər iki kənd çayların əhatəsindədir. Normadan artıq yağan yağıntılar səbəbindən çaylarda sululuğun artması kənd sakinlərinin narahatlığına səbəb olub.

Bum çayının sağ sahilində yerləşən Uludaş kəndinə demək olar ki, hər yağışdan sonra sel gəlir. Bəndin olmaması səbəbindən kəndə doğru axan su və lil qatı təsərrüfatlara ziyan vurur. Digər tərəfdən, sel suları kənd yollarında hərəkəti də müşkülə çevirir. Sakinlər təcili yardım maşınlarının yola görə kəndə gəlməkdən imtina etdiklərini bildirirlər. Nəticədə həkimə ehtiyac duyan xəstələr çarəsiz qalır.

Qəbələ Suvarma sistemləri idarəsindən isə bildirildi ki, problemdən xəbərdardırlar. Təhlükənin aradan qaldırılması üçün əraziyə texnika və canlı qüvvə cəlb edilib, müəyyən işlər görülüb. Sakinlərə isə ümid etmək qalır ki, həmin bənd salınanadək güclü yağıntılar davam etməsin.

Qəbələdə narkotik tərkibli bitkilərin kultivasiyası ilə məşğul olan şəxs saxlanılıb. 56 yaşlı Elçin Yaqubovun yaşadığı ünvana baxış keçirilərkən xüsusi qulluq göstərilmiş narkotik tərkibli bitkilər aşkar edilib. Araşdırmalarla Yaqubovun rayonun Bum qəsəbəsində elektrik naqillərini oğurladığı da üzə çıxıb.

Keçirilən digər tədbir zamanı isə narkotik vasitələrin qanunsuz dövriyyəsini təşkil edən Əbdülməlik Əliyev tutulub. Ona məxsus həyətyanı sahədən kultivasiya edilərək yetişdirilən çətənə kolları və 1 kiloqram marixuana aşkarlanıb. Faktlarla bağlı cinayət işi başlanılıb, araşdırmalar davam etdirilir.

İsmayıllının Qaraqaya kəndinin sakinləri uzun illərdir yolsuzluqdan əziyyət çəkirlər. Rayon mərkəzindən 22 km aralıda yerləşən kənd , necə deyərlər, gözdən uzaq, könüldən iraq düşüb. 400-dən çox əhalisi olan bu kənd Lahıc istiqamətinə gedən avtomobil yolunun üzərində yerləşir.

Rayonun turizm əhəmiyətli kəndlərindən biri olan, təmiz havası, füsunkar təbiəti ilə göz oxşayan Qaraqayanın yeganə problemi var, o da yolsuzluq...

Kənd istiqamətində avtomobillə hərəkət demək olar ki, mümkün deyil. Sakinlər, eləcə də kəndə gələn turistllər ya atla, ya ulaqla, ya da ki, piyada 2 km-dən artıq yol getməli olur.

Kənd sakinləri deyir ki, yağış yağan kimi rayon mərkəzilə əlaqələri kəsilir. Dağlardan gələn sel suları, lil qatı hərəkəti mümkünsüz edir. Sakinlərin sözlərinə görə, aylardır döymədikləri qapı qalmayıb. Amma nə kəndə gələn var, nə də gedən.

Məcburiyyət qarşısında sakinlər öz vəsaitləri hesabına təmir işləri aparmaq istəsələr də texnikanın olmaması səbəbindən işləri yarımçıq qalıb.

Məsələ ilə bağlı Qaraqaya kənd bələdiyyəsi ilə əlaqə saxladıq. Azər Bağırov yolun təmir ediləcəyini bildirdi. Onsuz da uzun müddətdir Qaraqaya sakinlərinin gözü yolda, qulağı səsdədir, texnikanın gəlməyini gözləyir.

Son günlər yağışların da ara verdiyini nəzərə alsaq, ümid edirik texnikalar tezliklə kəndə ayaq basar. Beləliklə Qaraqayalıların problemi həllini tapar.

Oğuzun Kərimli kəndi ərazisində yanğın qeydə alınıb. Qaraməryəm-İsmayıllı-Şəki avtomobil yolunun kənarında fəaliyyət göstərən aptek, baytarlıq apteki və geyim mağazasının yerləşdiyi ümumi sahəsi 170 kv/m olan bina yanıb.

Yanğının söndürülməsi üçün əraziyə Oğuz rayon Dövlət Yanğından Mühafizə Hissəsinin texnikası və şəxsi heyəti cəlb edilib. Hadisə nəticəsində aptek və içərisindəki dərman preparatlarının böyük hissəsi yanıb. Geyim mağazası və baytarlıq aptekinin də tavan hissəsinə ziyan dəyib. Xəsarət alan olmayıb. Faktla bağlı araşdırma aparılır.