Şəkinin Dodu məhəlləsi su sarıdan əziyyət çəkir. Məhəllə sakinləri bildirir ki, hər il içməli suya tələbatın çox olduğu yaz-yay aylarında problem yaşayırlar. İllər öncə çəkilən su sistemi artıq istismar müddətini başa vurduğundan hər yağışdan sonra sıradan çıxır. Nəticədə onsuz da lilli, istifadəyə yararsız şəkildə verilən su günlərlə gəlmir. Məhəllə sakinləri yeni su-kanalizasiya xəttinin çəkilişinin ləngidiyini və təmiz sudan istifadə etmək istədiklərini deyirlər.

Məsələ ilə əlaqədar Şəki Sukanal Törəmə ASC-yə müraciət etdik. Qurum rəsmisi problemin niyə həll edilmədiyini açıqladı. Belə çıxır ki, müqaviləsi olmayan vətəndaşlar yeni su-kanalizasiya sistemi çəkilənədək suyu pulla almalıdır. Onda sual yaranır, qurum vətəndaşa haqqı olan lazımı xidməti göstərmədiyi halda bunu niyə kompensasiya etmir?!

O ki, qaldı Şəki şəhərində illərdir davam edən yeni su-kanalizasiya çəkilişinin ləngiməsinə Su Ehtiyatları Agentliyindən bildirildi ki, işlərin 69 faizi yekunlaşıb. 2025-ci ildən isə layihənin növbəti mərhələsinə start veriləcək. Şəhərin ən böyük iki məhəlləsi - Dodu və Gəncəli məhəllələrində yeni nasos stansiyaları tikildikdən sonra əhali 24 saat içməli su ilə təmin olunacaq.

Türkiyənin Üsküdar Universitetinin nümayəndə heyəti Azərbaycana səfər çərçivəsində Kanal S-in qonağı olub. Televiziyanın Xəbərlər xidmətinin əməkdaşları ilə keçirilən görüşdə medianın hazırkı vəziyyəti, gələcək prespektivləri, inkişaf trendləri, jurnalistikanın tamaşaçıların dəyişən istək, tələblərinə uyğunlaşmasından danışlıb. İnkişaf edən informasiya texnologiyalarının tətbiqi, informasiya təhlükəsizliyi istiqamətində müzakirələr aparılıb.

Bildirilib ki, son illər Türk Universitetlər Birliyinin (TÜRKÜNİB) inkişafı, eləcə də ölkələrimiz arasındakı əlaqələrin daha da dərinləşməsi Azərbaycan universitetləri Türkiyənin digər universitetləri arasında əməkdaşlıq üçün yeni perspektivlər yaradıb. Üsküdar Universiteti Azərbaycanda medianın peşəkarlığının artırılması məqsədi ilə ötən ildən BDU, və AZMUİ ilə əməkdaşlıq edir. Gələn il jurnalistika ilə bağlı beynəlxalq simpoziumun BDU ilə birgə ilk dəfə olaraq Azərbaycanda təşkil edilməsi nəzərdə tutulub.

Şəki Şəhər Stadionunda “Şəki kuboku- 2024” futbol turnirinə start verilib. Əvvəlcə turnirin açılış mərasimi keçirilib. Çıxış edənlər iştirakçı komandalara uğurlar arzulayıb, yerli ifaçılar musiqilərini ifa ediblər. Daha sonra “Yak 40” və “Sheki City Gənclər” komandları arasında yarış başlayıb.

Yarışın yekun nəticəsinə əsasən isə “Yak 40” komandası 5-3 hesablı qələbə qazanıb. Qeyd edək ki, Şəkinin şəhər və kənlərindən ümumilikdə 12 komandanın qatıldığı yarışda 1-ci turda gündəlik iki oyun keçiriləcək. Qalib komandalar növbəti tura keçəcək.

Dövlət İmtahan Mərkəzinin ötən gün keçirdiyi ikinci və üçüncü ixtisas qrupları üzrə qəbul imtahanının nəticələri iki həftədən sonra elan olunacaq. Bu gündən etibarən imtahan protokolları və materialların emalına başlanılıb. Qeyd edək ki, ilkin məlumatlara əsasən, 4 nəfərdə mobil telefon aşkarlandığı üçün imtahandan xaric olunub.

Üzərində mobil telefon tutulduğu üçün imtahandan xaric olunanların müsabiqə nəticələri ləğv olunur və onlar ixtisas seçiminə buraxılmırlar. Dövlət İmtahan Mərkəzindən verilən məlumata görə, prosesdə ümumilikdə 47 min 520 abituriyentin iştirakı nəzərdə tutulub. Ən yaşlı abituriyentin 68 ən gəncinin isə 15 yaşı var. Əməkdaşlarımızsa imtahan prosesini Şəki şəhərində izləyib.