Şəki şəhər 8 nömrəli Beynəlmiləl Tam orta məktəbdə "Zəfər günü"nə həsr olunan voleybol üzrə açıq turnir başa çatıb. Məktəbli qızlar arasında keçirilən turnirin final mərhələsində 17 nömrəli məktəbin komandası ilə ev sahibləri qarşılaşıb. Gərgin mübarizə şəraitində baş tutan oyunda 8 nömrəli məktəbin komandası qələbə qazanıb. Qalib komanda Azərbaycan Milli yığma komandası ilə yoldaşlıq görüşü keçirib.

Ötən günün ikinci yarısından başlayaraq şimal-qərb bölgəsində qeyri-sabit hava şəraiti hökm sürüb. Güclü külək daha çox Zaqatala rayonunda müşahidə edilib. Rayon Fövqəladə Hallar Komissiyasından verilən məlumata görə, Zaqatala şəhərində iki müxtəlif yerdə qurumuş ağacların aşması, eləcə də iri budaqlarının qırılaraq elektrik naqillərinin üzərinə düşməsi nəticəsində qısaqapanmalar müşahidə edilib, elektrik enerjisinin verilməsində fasilələr yaranıb. Güclü külək, həmçinin şəhərin Vasif Qurbanov küçəsindəki çoxmərtəbəli yaşayış binasının dam örtüyünün bir hissəsini qoparıb. Çoxmənzilli yaşayış binasının dam örtüyünün qalıqları ərazidən götürülüb. Həmçinin binanın yağışdan qorunması üçün damın betonuna müvəqqəti örtük çəkilib. Binanın dam örtüyünün yenilənməsinə bu gün başlanılıb və növbəti günlərdə davam etdiriləcək. Eyni zamanda, elektrik təsərrüfatında yaranmış problemlərin aradan qaldırılması istiqamətində Zaqatala Paylayıcı Elektrik Şəbəkəsinin əməkdaşları və rayon Fövqəladə Hallar Komissiyasının üzvləri birgə tədbirləri davam etdirirlər.

Azərbaycan Təhsil İşçiləri Azad Həmkarlar İttifaqının Şamaxı rayon komitəsi rayonunun təhsil müəssisələrində çalışan şəhid ailələri,müharibə iştirakçıları ilə görüş keçirib. Çıxış edənlər 44 gün davam edən və işğal altındakı ərazilərimizin azad olunması ilə nəticələnən Vətən müharibəsinin tariximizin ən parlaq səhifəsinə, Azərbaycan xalqının iftixar və qürur mənbəyinə çevrildiyinə diqqət çəkiblər. Sonda təhsil sahəsində fərqlənən təhsil işçilərinə fəxri fərmanlar təqdim edilib.

Şəki şəhər 7 nömrəli tam orta məktəbdə 8 noyabr Zəfər gününə həsr olunan "Əfsanədən Zəfərə" adlı bayram tədbiri keçirilib. İştirakçılar torpaqlarımızın azad edilməsi uğrunda canından keçən şəhidlərin əziz xatirəsini yad ediblər. Çıxış edənlər 44 günlük Vətən müharibəsində qazanılan şanlı qələbədən, qəhrəman ordumuzun şücaətlərindən danışıblar. Tədbirin bədii hissəsində məktəbin şagirdləri vətənpərvərlik ruhunda şeir, musiqi, rəqs və səhnəciklər nümayiş etdirib.

Oğuzda avtomobil ağaca çırpılıb. Hadisə günorta saatlarında Qaraməryəm-İsmayıllı-Şəki avtomobil yolunun Oğuzun Kərimli kəndi ərazisindən keçən hissəsində baş verib. Kərimli kənd sakini 35 yaşlı Elşən İsmayılovun idarə etdiyi “VAZ-21099” markalı avtomobil idarəetmədən çıxaraq yolun kənarındakı ağaca çırpılıb. Zərbənin təsirindən avtomobil bir neçə hissəyə bölünüb. Sürücü xəsarət alaraq Oğuz Rayon Mərkəzi Xəstəxanasına yerləşdirilib. Faktla bağlı araşdırma aparılır.