Ötən il Dünya Meteorologiya Təşkilatı qış mövsümünün sərt keçəcəyi ilə bağlı proqnoz vermişdi. 2025-ci ilin qışının son 30-40 ilin ən soyuq qışı olacağı bildirilirdi. Hazırda qışın oğlan çağını yaşayırıq, ancaq nəinki dondurucu soyuqlar yaşanır, əksinə bir çox ərazilərə qar belə yağmayıb.

Azərbaycan ərazisində də yaz havası müşahidə olunur. Bəs, qış fəslinin bu qədər anomal isti keçməsi nə ilə əlaqədardır? Daha ətraflı sujetdə....

Şəkidə Azərbaycanının tanınmış bəstəkarı və musiqiçisi Polad Bülbüloğlunun 80 illik yubileyi münasibəti ilə “Gəl ey səhər” adlı yubiley gecəsi keçirilib. Şəki-Zaqatala Regional Mədəniyyət idarəsinin keçirdiyi tədbirdə ziyalılar, şəhər ictimiyyəti, mədəniyyət işçiləri, musiqisevərlər iştirak ediblər.

Polad Bülbüloğlu yaradıcılığı haqqında videoçarx nümayiş olunub. Rəsmi hissədə çıxış edənlər Polad Bülbüloğlunun Azərbaycan mədəniyyətinə, musiqisinə töhfələrindən danışıblar. Bildirilib ki, Azərbaycanın dünyada tanıdılmasında müstəsna xidmətləri olan Polad Bülbüloğlunun mahnıları idea-məzmun və üslub baxımından kifayət qədər rəngarəngdir.

Sənətkarın xidmətlərinin yüksək qiymətləndirildiyi vurğulanıb və onun bir çox mükafatlara, orden və medallara, fəxri adlara laiq görüldüyü xatırlanıb. Tədbirin bədii hissəsində Şəki şəhər 2 nömrəli uşaq musiqi məktəbinin kollektivinin ifasında Polad Bülbüloğlu reperturarından “Gəl ey səhər”, “Durnalar”, “Toydan sonra düzələr”, “Mavi gözlüm”, “Gözlə məni”, “Aman aman ayırlıq”, “Şən Azərbaycan” və digər mahnılar səsləndirilib.

Şamaxıda gənclər siyasəti və onların inkişafı mövzusunda tədbir keçirilib. Rayon rəsmiləri, ictimaiyyət nümayəndələri və gənclərin iştirak etdiyi tədbirdə çıxış edənlər Ulu Öndər Heydər Əliyevin əsasını qoyduğu dövlət gənclər siyasətinin Prezident İlham Əliyev tərəfindən uğurla davam etdirildiyini, ölkəmizdə gənclərin hərtərəfli inkişafı üçün geniş imkanların yaradıldığını diqqətə çatdırıblar.

Gənclərin fəal iştirakı ilə həyata keçirilən tədbirlərdən danışılıb. Sonda rayonun ictimai-siyasi və mədəni həyatında nailiyyətləri ilə fərqlənən gənclər təltif olunub.

Fövqəladə Hallar Nazirliyindən verilən məlumata görə, Dövlət Yanğın Nəzarəti Xidməti tərəfindən Balakən şəhərində yerləşən “Balməkan” marketində keçirilən yoxlama zamanı yanğın təhlükəsizliyi sahəsində çoxsaylı nöqsanların mövcud olduğu, həmin nöqsanların insan həyatı və ya sağlamlığına, ətraf mühitə və dövlətin əmlak maraqlarına birbaşa təhlükə yaratdığı müəyyən edilib.

Qeyd olunanları nəzərə alaraq, yanğın təhlükəsizliyi norma və qaydalarının tələblərinin kobud pozulması faktları aşkar edilən marketinin fəaliyyətinin dayandırılması barədə qərar qəbul olunub.

Balakəndə polis əməkdaşları tərəfindən saxta spirtli içkilər hazırlayaraq satışnı təşkil edən dəstə üzvlərinə qarşı əməliyyat keçirib.

Əməliyyat zamanı əməli törətməkdə şübhəli bilinən 5 nəfər müəyyən olunub. Onlara məxsus Balakən, Zaqatala, Qax və Masazır qəsəbəsində yerləşən saxlanc yerlərinə baxış keçirilərkən xeyli sayda saxta spirtli içkilər, yerli və xarici əmtəə nişanı etiketləri, qapaqlar, qidada istifadəsi nəzərdə tutulmayan texniki spirt, eləcə də digər avadanlıqlar aşkarlanıb. Əməliyyatlar davam etdirilir.

Şamaxıda baş verən digər bədbəxt hadisə zamanı isə 1-ci Çaylı kənd sakini, 8 aylıq körpə Yusif Bəşirov yanıq xəsarətləri alıb. Evdə oynayarkən ehtiyatsızlıq səbəbindən qaynar suyun üzərinə tökülməsi nəticəsində üçüncü dərəcəli yanıq xəsarətləri ilə alan azyaşlı rayon mərkəzi xəstəxanasına yerləşdirilib.

Qəbələdə bədbəxt hadisə baş verib. Rayonunun Vəndam qəsəbəsində Ağcabədi rayon sakini 15 yaşlı Hüseyn Hüseynov kirayədə yaşadığı evin hovuzunda boğularaq ölüb. Faktla bağlı araşdırma aparılır.