“Şəhərdən Kəndə” layihəsinə müraciət edən arıçı fermer aqroturizm modulu üzrə keçirilən xüsusi təlim proqramında iştirak edib və proqramı uğurla tamamlayıb. Bununla da arıçılıq məhsullarının istehsalı və satışı ilə yanaşı, təsərrüfat sahəsində yerli və xarici turistləri qonaq etməklə əlavə gəlir mənbəyi yaradıb. Layihə çərçivəsində təsərrüfatda yenidənqurma işləri aparılıb və təsərrüfat abadlaşdırılıb, bir sıra avadanlıqlar və əşyalarla təmin olunub. Görülən işlərlə tanış olmaq məqsədi ilə “Aqrar Tədarük və Təchizat” ASC-nin və rayon icra hakimiyyətinin rəsmiləri təsərrüfatı ziyarət ediblər. Tanışlıq turunda Şəhid övladları və aztəminatlı ailəlrin uşaqları da iştirak edib. Oyun meydançasında əylənən azyaşlılar təsərrüfatda sərgilənən milli mətbəx nümunələrini dadıb. Onlara hədiyyələr təqdim edilib. “Şəhərdən Kəndə” layihəsinin məqsədi ölkəmizdə aqroturizmin inkişaf etdirilməsi, regionlarda yaşayan əhalinin məşğulluğunun artırılması, yerli fermer təsərrüfatları üçün alternativ satış kanalı, eləcə də şəhər sakinləri və xarici turistlər üçün fərqli turizm imkanlarının yaradılmasıdır. Bu günə qədər yerli və əcnəbi mütəxəssislər tərəfindən həyata keçirilən təlimlərdə 115 təsərrüfat sahibi iştirak edib. Ümumilikdə isə layihəyə qoşulmaq üçün 200-dən artıq aqrar sahibkar qeydiyyatdan keçib. Baxış keçirilən 134 fermer təsərrüfatından 97-si aqroturizm fəaliyyətləri üçün uyğun hesab edilib.

Şəki şəhərində Dövlət Məşğulluq Agentliyinin təşəbbüsü ilə məktəblilərlə “Karyera planlaması” adlı tədbir baş tutub. Əsas məqsədi 8-11-ci sinif şagirləri arasında peşəyönümlü məsləhət xidmətlərinin aparılması olan tədbirdə icra hakimiyyətinin, məşğulluq agentliyinin nümayəndləri, müxtəlif peşə sahibləri, məktəblilər iştirak ediblər. Çıxış edənlər şagirdlərə gələcək karyeralarında uğur qazanmağın ilkin mərhələsi olan ixtisas seçiminin vacibliyindən danışıblar. Tədbirdə gənclərə karyera axtarışında uğurlu seçim, əmək bazarındakı vəziyyət, ixtisas və ya peşə seçimi edərkən nələri nəzərə almaq lazımdır və s. mövzular haqqında məlumatlar verilib. Həmçinin xatırladılıb ki, xidmətin saytında mövcud olan alo karyera, ixtisas.az kimi elektron resurslar şagirdlərə gələcək ixtisas seçimində köməklik edə bilər. Tədbirə dəvət olunan müxtəlif peşə sahibləri öz uğurlu karyeraları və təcrübələrini məktəblilərlə paylaşıblar. Sonra şagirdləri maraqlandıran mövzular ətrafında fikir mübadiləsi aparılıb, onların sualları cavablandırılıb. Debatlarda aktiv iştirak edən gənclərə hədiyyələr təqdim olunub.

Şəki Regional Debat Mərkəzinin təsis edilməsinin 10 illiyi münasibətilə konfrans keçirilib. Tədbirdə idarə heyyətinin rəsmiləri, İcra nümayəndəliyi, Regional Təhsil idarəsinin əməkdaşları, QHT üzvləri, şəhid ailələri və bir sıra ictimayyət nümayəndələri iştirak edib. Mərkəzin fəaliyyətinə həsr olunmuş videoçarx nümayiş etdirilib. Daha sonra konfransda çıxış edənlər 10 illik yola qısa nəzər salıblar, əldə olunan uğurlardan bəhs edilib. Tədbirin sonunda şəhid ailələrinə, fəaliyyətində fərqlənmiş bir sıra gənclərə və rəhbərlərə fəxri fərmanlar və diplomlar verilib.

Şəkinin Cəfərabad kəndində Vətən müharibəsinin şəhidi Ruslan Sadıqovun anım günü qeyd edilib. Ailəsi, yaxınları, qazilər şəhidin qəbri ziyarət edib, ruhuna dualar oxuyub. Daxili Qoşunların "Yarasa" xüsusi təyinatlı dəstəsinin atəş təminatı snayper yarım qrupunun komandiri Ruslan Sadıqov 2020-ci ilin sentyabrında erməni silahlı birləşmələrinin təxribatlarının qarşısının alınması üçün başladılan əks hücum əməliyyatlarının ilk günlərindən Vətən müharibəsində iştirak edib. Füzulidən Şuşaya qədər şanlı döyüş yolu keçib, düşmənin onlarla canlı qüvvəsini və texnikasını məhv edib. Dünya hərb tarixinə düşən Şuşanın azad edilməsi əməliyyatında iştirak edən baş çavuş Ruslan Sadıqov düşmənə qan udduraraq öz qəhrəmanlığı ilə tarixə düşüb. Şəhidin 3 övladı yadigar qalıb.

Vətən müharibəsi şəhidi Fərid İzzətliyə həsr olunan "Cənab Leytenant " sənədli filminin təqdimat mərasimi keçirilib. Mərasimdə şəhər rəhbərliyi, mədəniyyət və incəsənət xadimləri, müharibə iştirakçıları, şəhid ailələri və ictimaiyyət nümayəndələri iştirak edib. Qeyd edək ki, filmdə şəhid Fərid İzzətlinin ömür səhifələri vərəqlənib, onun uşaqlıq dövrü, məktəb illəri, əldə etdiyi uğurlar, nümunəvi xidməti və Vıtın müharibəsində göstərdiyi şücaətlər geniş yer alıb.

Artıq ikinci ildir ki, uğurla təşkil olunan, Müzəffər Ali Baş Komandan İlham Əliyevin yenilməz iradəsi, xalqımızın birliyi və ordumuzun gücü hesabına qazanılmış tarixi Qələbəyə həsr edilən “Xüsusi Təyinatlı Gənclik” düşərgəsi gənclərin hərbi-fiziki hazırlığını yüksəltməyə, onları idmana və sağlam həyat tərzinə təşviq etməyə, vətənpərvərlik və həmrəylik hissinin daha da gücləndirməsinə öz töhfəsini verir. “Zəfərimiz” şüarı altında açıq hava şəraitində 7 komanda şəklində ümumilikdə 120 gənc iştirak edir. Düşərgə müddətində gənclərə simulyativ hərbi əməliyyat proqramı əsasında Xüsusi Təyinatlı Qüvvələrin ehtiyatda olan zabit və gizir heyəti tərəfindən topoqrafiya, dağçılıq, mühəndis-istehkam, kəşfiyyat, sıra hazırlığı, ilkin tibbi hazırlıq, kütləvi qırğın silahlarından müdafiə hazırlığı, ekstremal şəraitdə həyatda qala bilmə, silahla davranış, atəş hazırlığı, əlbəyaxa döyüş üzrə praktiki təlimlər keçiriləcək. Həmçinin gənclər üçün hərbi idman oyunları, təbiətə ekskursiyalar və asudə vaxtda müxtəlif əyləncələrin də keçirilməsi nəzərdə tutulub. Qeyd edək ki, 5 gün davam edəcək düşərgənin sonunda qaliblər mükafatlandırılacaq. 

İsmayıllıda avtomobil iki piyadanı vurub. Rayonunun Topçu kəndi ərazisində Qurbanəfəndi kənd sakini Dağlar Ələsgərov idarə etdiyi “VAZ-2101” markalı avtomobillə yolu keçən Bakı şəhər sakinləri Ləman Dadaşova və Dilarə Hacıyevanı vurub. Nəticədə piyada Ləman Dadaşova hadisə yerində ölüb, Dilarə Hacıyeva isə xəstəxanaya yerləşdirilib. Faktla bağlı DİN Baş İstintaq və Təhqiqat İdarəsi araşdırma aparır.

Zaqatalanın mərkəzindən 22 kilometr aralıda yerləşən ən ucqar kəndlərdən biri olan Sabunçu kəndinə getmək üçün 4 kilometrədək yolu çaylaq, daşlı ərazidən, və bir neçə çay yatağından keçməli olduq. Çətin, keçilməz relyefə məxsus dağlıq ərazidə yerləşən digər ucqar kəndlər kimi bu kəndin də ən ciddi problemi elə yolla bağlıdır. Çayda suyun səviyyəsi artdığı təqdirdə kəndin mərkəzlə əlaqəsi bəzən günlərlə kəsilir. Digər vaxtlarda isə kəndə yalnız xüsusi nəqliyyat vasitlərinin köməyi ilə getmək mümkündür. Əsrarəngiz gözəlliyi ilə göz oxşayan Sabunçuda hazırda 45-ə dək təsərrüfat və 200 nəfərə yaxın əhali yaşayır. Kənddə bir ümumi orta məktəb, kənd klubu, məscid və bir tibb bacısının çalışdığı tibb məntəqəsi fəaliyyət göstərir. Ucqar ərazidə yerləşməsinə baxmayaraq, Sabunçu kəndi elektrik enerjisi, rabitə və internet kimi vacib infrastrukturla təmin edilib. Ən qədim yaşayış məskənlərindən biri olan bu kəndin əhalisinin böyük qismi ötən əsrin ortalarında,  çətin relyeflinin olması və sel, daşqın kimi təhlükələrə görə aran ərazilərə köçürülüb. Əzgilli, Ələsgər, Qalal, Qas kimi Sabunçu kəndinin də təbiətinin gözəlliyi bu ərazidə yaşıl turizmin yaradılması üçün olduqca əlverişlidir. Yeganə çatışmayan cəhət isə, yolla bağlıdır. Ucqun, daşqın, sel kimi təbii təhlükələr bu ərazidə normal yol çəkilişini mümkünsüz edir. Lakin, bu kəndlərdə yaşayan sakinlər əmindirlər ki, mütəxxəsislər onların bu yol problemi üçündə hansısa altenativ həll yolu tapacaq.