Bu gün bizə miras qalan müstəqil Azərbaycan dövləti Ulu öndər Heydər Əliyevin şah əsəridir. Daim inkişafda olan, yenilənən, çiçəklənən Azərbaycan məhz Ümummilli liderin ideyaları, tövsiyələri sayəsində yüksəliş yolunda inamla irəliləyir. 15 iyun-Milli Qurtuluş Günü münasibəti ilə keçirilən silsilə tədbirlərdə bu fikirlərə diqqət çəkilib. 15 İyun - Milli Qurtuluş Günü münasibətilə Zaqatalada keçirilən tədbirdə ilk öncə müstəqil Azərbaycanın memarı və qurucusu, ümummilli lider Heydər Əliyevin abidəsi ziyarət olunub, xatirəsi ehtiramla yad edilib. Ardınca keçiirlən tədbirdə 1993-cü ilin iyun hadisələrindən bəhs edən sənədli film nümayiş edilib. Tədbirdə çıxışlar zamanı qeyd olunub ki, hər bir xalqın tarixində böyük əhəmiyyət daşıyan elə günlər var ki, onun gələcək həyatını müəyyən edən böyük başlanğıcın əsası məhz həmin günlərdə qoyulur. Bu baxımdan tariximizə Milli Qurtuluş Günü kimi daxil olmuş 15 iyun böyük ictimai, siyasi və tarixi əhəmiyyətə malik bir gündür. Bu tarixi yaradan isə Azərbaycanın inkişafında, müstəqilliyində, gələcəyində müstəsna rol oynayan, daim xalqına arxalanan, xalqına arxa və dayaq olan dahi şəxsiyyət – ümummilli lider Heydər Əliyevdir. Qaxda da 15 iyun-Milli Qurtuluş Günü münasibətiilə tədbir keçirilib. İştirakçılar ilk öncə şəhərin mərkəzində ucaldılmış Ulu Öndər Heydər Əliyevin abidəsi önünə gül dəstələri düzərək xatirəsini ehtiramla yad ediblər Heydər Əliyev Mərkəzində keçirilən tədbirdə çıxış edənlər Heydər Əliyevin yenidən siyasi hakimiyyətə qayıdışını Azərbaycanın ən yeni tarixində uğurlu mərhələnin başlanğıcı kimi dəyərləndiriblər. Heydər Əliyevin yaratdığı siyasi xəttin İlham Əliyev tərəfindən uğurla davam etdirildiyi xüsusi vurğulanıb. Qəbələdə də Milli Qurtuluş günü münasibəti ilə ümumrayon tədbiri keçirilib. Tədbirdə rayon rəhbərliyi, idarə və təşkilatların nümayəndələri , eləcə də rayon ictimaiyyəti iştirak edib. Tədbir iştirakçıları Heydər Əliyevin abidəsi önünə gül dəstələri düzərək, Ulu Öndərin xatirəsini ehtiramla yad ediblər. Qeyd olunub ki, milli dövlətçiliyimizin, onun suverenliyinin qorunub saxlanılmasına Azərbaycanda müstəqil, demokratik, hüquqi dövlətin şanlı tarixini yaradan ulu öndər Heydər Əliyevin uzaqgörənliyi və qətiyyəti sayəsində nail olunub. Ağsuda 15 iyun-Milli Qurtuluş Günü münasibətilə “Milli dövlətçiliyimizin xilaskarı” mövzusunda tədbir keçrilib. Ulu öndər Heydər Əliyevin həyat və fəaliyyətini əks etdirən video-film nümayiş etdirilib. Çıxış edənlər vurğulıayıb ki, taleyimizin həll olunduğu ağır bir zamanda xalqın təkidli tələbinə səs verərək yenidən hakimiyyətə qayıdan Heydər Əliyev doğma Vətənin xilası naminə misilsiz fədakarlıq nümayiş etdirib. Bütün sahələrdə müşahidə olunan dərin tənəzzülün qarşısını alaraq yenidən qurduğu və qoruduğu dövlətin dayanıqlı inkişaf yolunu müəyyən edib. Bayram tədbirləri axşam saatlarında konsert proqramları ilə davam edib.

Bu gün Qəbələdı Rayon Prokurorluğunun yeni inzibati binası istifadəyə verilib. Açılış mərasiminə baş prokuror Kamran Əliyev də qatılıb. Baş propkurorun sədrliyi ilə Ulu Öndər Heydər Əliyevin anadan olmasının 100 illiyinə həsr edilmiş xüsusi iclas da keçirilib. Qəbələ Rayon Prokurorluğunun yeni inzibati binasının açılış mərasimində Baş prokuror Kamran Əliyev, digər dövlət və hüquq-mühafizə orqanlarının əməkdaşları iştirak ediblər. Əvvəlcə iştirakçılar yeni inzibati binanın foyesində Ulu Öndər Heydər Əliyevin büstü önünə gül dəstəsi qoyaraq, dahi şəxsiyyətin unudulmaz xatirəsinə ehtiramlarını bildiriblər. Baş prokuror Kamran Əliyev Ümummilli Lider Heydər Əliyev, eləcə də Azərbaycan Prezidenti İlham Əliyevin prokurorluq orqanlarına göstərdikləri yüksək diqqət və qayğıdan bəhs edib. Yeni binanın istifadəyə verilməsini prokurorluq əməkdaşlarının əməyinə verilən yüksək qiymət kimi dəyərləndirən Baş prokuror Azərbaycan dövlətinin inkişafı naminə bundan sonra da böyük səylə çalışacaqlarını bildirərək kollektivə uğurlar arzu edib.Daha sonra iştirakçılar Qəbələ Rayon Prokurorluğunun yeni binasında yaradılan şəraitlə tanış olublar. İkimərtəbəli binada vətəndaşların qəbul otağı, prokuror, prokuror köməkçiləri, müstəntiq və inspektorlar üçün otaqlar, kriminalistika otağı, kitabxana, yeməkxana, dəftərxana, arxiv və idman zalı yaradılıb. Qəbələ Rayon Prokurorluğu üçün müasir standartlara uyğun tikilmiş inzibati bina bütün zəruri avadanlıq, kompüter sistemi, kommunikasiyalar və qurğuları ilə təchiz edilib, mebel və digər inventarlarla təmin olunub. Ardınca Qəbələdə Baş prokuror yanında Elmi-Məsləhət Şurasının Ulu Öndər Heydər Əliyevin anadan olmasının 100 illiyinə həsr edilmiş xüsusi iclası keçirilib. İclasa sədrlik edən Baş prokuror Kamran Əliyev Heydər Əliyevin ölkəmizin mövcudluğunda xilaskar rolu və əhəmiyyəti haqqında söhbət açıb, Ümummilli Liderin dərin zəkası və zəngin dövlət idarəçiliyi təcrübəsinə uyğun olaraq ölkədə həyata keçirdiyi dövlət quruculuğu işləri və hüquq siyasəti barədə iclas iştirakçılarını məlumatlandırıb. Xüsusi olaraq vurğulanıb ki, Ulu Öndər Heydər Əliyevin müasir Azərbaycan Prokurorluğunun formalaşmasında rolu və əhəmiyyəti əvəzolunmazdır. İclasda “Ümummilli Lider Heydər Əliyevin hüquqi islahatlar strategiyası və beynəlxalq hüquq sisteminə inteqrasiya”, “Qurtuluş məfkurəsi: Azərbaycan dövlətçiliyinin yeni tarixi mərhələsi”, “Müasir prokurorluğun inkişafında Heydər Əliyevin irsi” mövzularında çıxışlar olub. Maraqlı müzakirələr şəraitində keçirilən tədbir Baş Prokurorluğun təşəbbüsü ilə ərsəyə gəlmiş Ümummilli Liderin xatirəsinə həsr olunan “Böyük şəxsiyyət...3 ştrixdə” adlı sənədli filmin nümayişi ilə yekunlaşıb.

Şəki Regional Ədliyyə Şöbəsində 15 İyun - Milli Qurtuluş Gününə həsr olunmuş tədbir keçirib. Çıxış edənlər vurğulayıb ki, 15 iyun tarixi - Azərbaycanın xaosdan, anarxiyadan, hərc-mərclikdən, özbaşınalıqdan, parçalanma təhlükəsindən qurtularaq sabitliyə, əmin-amanlığa, inkişafa qovuşmasının əsasının qoyulduğu, ölkəmizin taleyinin dəyişdiyi böyük ictimai, siyasi və tarixi əhəmiyyətə malik gündür. Bildirilib ki, Ulu Öndərin hakimiyyətə qayıdışı dövlətimizin möhkəmlənməsində, sivil dünyaya sıx inteqrasiya prosesinə qoşulmasında və xalqımızın strateji mənafelərini təmin edən modern cəmiyyətin qurulmasında həlledici rol oynayıb.

Növbəti sujetdə əslində çoxlarımız keçmişə qayıdacağıq. Kimi uzaq keçmişə, kimi yaxın illərə. Qulağımıza ömürlük həkk olunan o səsin sorağı ilə. Bəli, son zəngdən danışıram.Bu gün ölkədə məzunlar üçün “Son zəng” çalındı. Əməkdaşlarımız məktəbə əlvida deyib, yeni həyata doğru yol alan məzunlarla həmsöhbət olub, onların həyəcanına ortaq olublar. Şəkidə keçirilən Son zəng tədbirlərindən maraqlı anları birlikdə izləyək... Şəkinin məktəblərində də bu gün \"Son zəng\" çalınıb. Rayon üzrə 1810 şagird orta təhsilini başa vuraraq, məzun adını alıb. Son Zəng tədbirləri rayonun bütün məktəblərində Elm və Təhsil Nazirliyinin tapşırıqları nəzərə alınmaqla keçirilib. Tədbir ümumi təhsil müəssisələrinin həyətyanı sahəsində təşkil olunub. Məzunlar, eləcə də birinci və dördüncülər mahnı və rəqslərdən ibarət bir-birindən maraqlı kompozisiyalarla tədbirə rəng qatıblar. Nə az, nə çox düz 11 il əvvəl ilk dəfə qədəm qoyduqları doğma məktəbdən indi elmə-savada yiyələnərək ayrılan məzunlar həyəcan və sevinclə yanaşı, həm də kədər hissi keçirirdilər. “Son Zəng” tədbirlərində həmçinin uğurları ilə seçilən məzunlar, eləcə də digər şagirdlər təbrik edilib, mükafatlandırılıb. Beləliklə, vaxt gəldi çatdı və məzunlar üçün sonuncu zəng çalındı... Qeyd edək ki, bu gün respublika üzrə 4 mindən çox məktəbdə sonuncu zəng çalınıb. 98 min 649 nəfər şagird, müəllimləri ilə vidalaşıb.

Balakəndə Dövlət Yol Polisi Bölməsinin əməkdaşları avtomobillərdə konstruksiya dəyişikliyi edən sürücülərə qarşı reyd keçiriblər. Şəhər ərazisində hərəkətin intensiv olduğu küçə və prospektlərdə keçirilən tədbirlər zamanı nəqliyyat vasitəsinə əlavə avadanlıq quraşdıran, konstruksiya dəyişikliyinə yol verən avtonəqliyyat vasitələrinin sürücüləri saxlanılıb. Yerində aradan qaldırılması mümkün olmadığından avtomobillər müvəqqəti duracağa yerləşdirilib və sürücülər barəsində inzibati protokollar tərtib edilib.

Dini Qurumlarla İş üzrə Dövlət Komitəsinin təşkilatçılığı ilə Zaqatalada “Müasir çağırışlar və qarşıda duran əsas hədəflər” mövzusunda üçgünlük regional konfrans keçirilib. Tədbirdə DQİDK və Zaqatala Rayon İcra Hakimiyyətinin rəhbər şəxsləri, dini konfessiya, eləcə də ictimaiyyət nümayəndələri iştirak edib.Çıxışlar zamanı Azərbaycanın müxtəlif millətlərə və dinlərə məxsus insanların birgə mehriban yaşadığı, Şərqlə Qərb, Qərblə İslam dünyası arasında bir körpü olaraq mədəniyyətlər və sivilizasiyalararası dialoqa böyük önəm verən ölkə olduğu vurğulanıb. Konfrans çərçivəsində din sahəsində həyata keçirilən dövlət siyasətinin əsas istiqamətləri barədə məlumat verilib. Ölkəmizdə dini sabitliyin qorunub saxlanılması və dini maarifləndirmə sahəsində görülməsi zəruri olan məsələlərə toxunulub. Prezident İlham Əliyevin rəhbərliyi ilə Azərbaycanda formalaşan tolerantlıq və birgəyaşayış mühitinin ölkəmizi dünyada multikulturalizm mərkəzinə çevirdiyi qeyd edilib. Vurğulanıb ki, Azərbaycanda radikal cərəyan mənsublarına qarşı mübarizədə bir sıra vasitələrdən istifadə edilir, ölkəmizdə bu sahədə praktiki yöndən işlər mühüm nəticələr verir. Dini maarifləndirmə işinin düzgün və səmərəli təşkili, cəmiyyətimizin müxtəlif din və millətlərin mənsublarının birgəyaşayış tərzinə olan münasibəti bu nəticələrin qazanılmasında həlledici rol oynayır.

Şəki Şəhər İcra Hakimiyyətinin təşkilatçılığı ilə 15 iyun – Milli Qurtuluş Gününə həsr olunmuş “Milli dövlətçiliyimizin xilaskarı” mövzusunda konfrans keçirilib. Rayon administrasiyası, ictimaiyyət nümayəndələrinin iştirak etditi tədbirdə çıxış edənlər müstəqil dövlətimizin qurtuluş tarixindən, Heydər Əliyevin xilaskarlıq missiyasından geniş söhbət açıblar. Vurğulanıb ki, Azərbaycan xalqı 1990-cı illərin əvvəllərində düşdüyü iqtisadi böhrandan zəngin idarəçilik təcrübəsinə malik, nüfuzlu dövlət xadimi Heydər Əliyevin müdrik, uzaqgörən siyasəti nəticəsində xilas olub. Sonra Yeni Azərbaycan Partiyasının Şəki rayon təşkilatına yeni üzv olan bir sıra şəxslərə üzvlük vəsiqələri təqdim edilib. Tədbir bədii hissə ilə davam edib.