Yeni Azərbaycan Partiyasının Şəki rayon təşkilatının yaradılmasınının 31-ci ildönümü qeyd olunub. Tədbir iştirakçıları əvvəlcə Ulu öndər Heydər Əliyevin abidəsi önünə gül dəstələri düzərək əziz xatirəsini yad ediblər.

Rəsmi hissədə çıxış edənlər Azərbaycan dövlətçiyinin formalaşmasında, ictimai-siyasi sabitliyin bərqərar olmasında, ölkəmizin beynəlxalq aləmdə nüfuzunun artmasında Yeni Azərbaycan Partiyasının xidmətlərindən bəhs ediblər.

Vurğulanıb ki, Ümummilli liderin yaradıcısı olduğu, Prezident İlham Əliyevin rəhbərlik etdiyi YAP cəmiyyətdə nüfuzunu daha da artırır, sıralarını möhkəmləndirir. 87 ərazi partiya təşkilatını özündə birləşdirən YAP Şəki təşkilatının hazırda 11 min 196 nəfər üzvü var. Partiya üzvlərinin 53.9 faizini qadınlar, 12.5 faizini isə gənclər təşkil edir. Tədbirdə həmçinin uzun illər YAP sıralarında səmərəli fəaliyyət göstərən bir qrup partiya fəalına fəxri fərmanlar, həmçinin partiya sıralarına yeni qəbul olunan gənclərə üzvlük vəsiqələri təqdim olunub.

Karyera və Psixologiya Mərkəzinin İSİM layihəsi çərçivəsində Elm və Təhsil Nazirliyinin dəstəyi ilə ibtidai sinif müəllimləri üçün keçirilən təlimlər davam edir. Növbəti belə təlim Şəki və Zaqatalada baş tutub. Şəki şəhər 11 nömrəli məktəbdə 250-dək ibtidai sinif müəllimi iştirak edib.

İbtidai sinif şagirdlərinin düzgün inkişaf yolları, şagirdlərin dərslərə köklənə bilməsi üçün hədəfin necə formalaşdırılması və digər məsələlər barədə müəllimlərə əhəmiyyətli tövsiyyələr verilib.

Zaqatala şəhər akademik Z. Əliyeva adına Texniki Fənlər Təmayüllü Liseydə sə təlimlərə 150-dək ibtidai sinif müəllimi qatılıb. Qeyd edək ki, İSİM layihəsində aktiv iştirak edən müəllimlər "Layihə müəllimi" adını qazanırlar və onlar öz şagirdlərini İSİM metodikası ilə inkişaf etdirirlər.

Son illər Azərbaycanda ceyran populyasiyası bərpa edilir və onların sayları artırılır. Bu məqsədlə növbəti dəfə Acınohur düzünün Qax Dövlət Təbiət Yasaqlığına aid ərazisinə ceyranların buraxılması həyata keçirilib. Ekologiya və Təbii Sərvətlər, Kənd Təsərrüfatı nazirliklərinin, Ümumdünya Təbiəti Mühafizə Fondunun, Qax rayon İcra Hakimiyyətinin nümayəndələrinin, ETSN yanında İctimai Şuranın üzvlərinin və ekokönüllülərin iştirakı ilə 8 baş ceyran təbiətə buraxılıb.

Eyni zamanda o da bildirilib ki, hazırda ölkədə ən böyük ceyran populyasiya məhz Şirvan milli parkı ərazisindədir. Belə ki, ötən əsrdə antropogen təsirlər nəticəsində ceyranların sayı azalmışdı. Ancaq həmin əraziyə milli park statusu veriləndən sonra, bu heyvanların populyasiyasının artmasına səbəb oldu.

Qeyd edək ki, 2010-cu ildən etibarən artıq 370 baş ceyran ölkənin müxtəlif ərazilərinə reintroduksiya olunub.

Şəhid heykəltaraş Samir Kaçayevin xatirəsinə həsr edilmiş yaradıcılıq sərgisi keçirilib. Əvvəlcə şəhidin Çuxuryurd kəndində yerləşən məzarı ziyarət olunub,xatirəsi ehtiramla anılıb. “Daşa can verib, “Küləklə sovrulan”” adlı yaradıcılıq sərgisi Şamaxı Rayon İcra Hakimiyyətinin və Dağlıq Şirvan Regional Mədəniyyət İdarəsinin birgə təşkilatçılığı ilə Şamaxı Yaradıcılıq Mərkəzində baş tutub.

Şəhidin ailə üzvləri, rayon rəsmiləri və Azərbaycan Dövlət Rəssamlıq Akademiyasının müəllimləri və ictimaiyyət nümayəndələri sərgidə iştirak ediblər.Tədbirdə iştirak edənlər Samir Kaçayevin həyat və yaradıcılığından, onun yüksək vətənpərvərliyindən söz açıblar. Torpaq uğrunda şəhid olmağın ən ali, uca zirvə olduğu vurğulanaraq şəhidlərin daim elin yaddaşında xatırlanacağı bildirilib.

Qeyd edək ki, Samir Kaçayev 2016-cı ilin aprel ayında torpaqlarımızın azad olunması uğrunda erməni işğalçılarına qarşı Talış kənd istiqamətində gedən döyüşlərdə qəhrəmancasına şəhid olub. Samir Kaçayev ölümündən sonra İgidliyə görə” medalı ilə təltif edilib. Prezident İlham Əliyev, birinci xanım Mehriban Əliyeva 2021-ci il noyabrın 1-də Şamaxıya səfər zamanı Samir Kaçayevin “Küləklə sovrulanlar” kompozisiyasının instalyasiyasına baxış keçirib, şəhidin ailəsi ilə görüşüblər