Mədəniyyət Nazirliyinin tabeliyindəki musiqi, incəsənət məktəb və mərkəzlərinə təhsilalanların 2024/2025 ci tədris ili üzrə qəbul imtahanları davam edir. Şəki Zaqatala Regional Mədəniyyət idarəsinin tabeliyindəki musiqi, incəsənət məktəblərinə qəbul olmaq üçün ümumilikdə 900-ə yaxın təhsilalan müraciət edib.

Namizədlər arasında seçimi Şimal-Qərb bölgəsinin 6 rayonunda 10 komissiya həyata keçirir. Uğur qazanan təhsilalanlar 3 gün müddətində sistem üzərindən təhsil alacaqlarını təsdiq etməlidirlər. Xatırladaq ki, iyunun 20-dən başlayan qəbul imtahanları 23-dək davam edəcək.

Ölkənin hər yerində olduğu kimi ən böyük taxılçılıq rayonlarından Şəkidə taxıl biçininə start verilib. Şəki rayonunda bu il 58 min hektardan artıq sahədə taxıl əkilib ki, onun da 24 min hektarı buğda sahəsidir.

Bu sahələrin yalnız 16 704 hektarı şərti suvarılan torpaqlar, qalanı isə dəmyə torpaqlardır və yalnız yağış suyu ilə qidalanır. Bir neçə ildir, quraqlıqdan əziyyət çəkən şəkili fermerlərin indi üzü gülür.

Taxıl sahələrinin texnika ilə təminatına gəlincə isə DAİM-dən hazırda sahələrdə 119 kombaynın işlədiyi, həmçinin digər rayonlardan da kombaynların dislokasiya olunmağa davam etdiyi bildirildi.

Qeyd edək ki, DAİM-in mütəxəssiləri bu il Şəki rayonunda 150 min tondan çox taxıl istehsal olunacağını proqnozlaşdırır.

Müəllimlərin sertifikatlaşdırma prosesinin test imtahanı mərhələsinə başlanılıb. Bu il riyaziyyat, Azərbaycan dili, ingilis dili, rus dili, rus ədəbiyyatı, alman dili, fransız dili üzrə müəllimlərin sertifikatlaşdırmadan keçirilməsi nəzərdə tutulur. 21-24 iyun tarixlərində keçiriləcək imtahanlar ölkənin 13 müxtəlif şəhəri üzrə 23 mərkəzdə təşkil olunub.

Şəki-Zaqatala regional təhsil idarəsinin tabeliyində olan məktəblərin 1820 təhsil verəni sertikatlaşdırma imtahanlarına cəlb olunublar. Mil-Muğan regionu üzrə isə 440-a yaxın müəllim imtahanda iştirak edib.

Təhsildə keyfiyyətin artırılmasını nəzərdə tutan sertifikasiyanı müəllimlər üçün cəlbedici edən həm də göstərdikləri nəticəyə uyğun əməkhaqqlarına ediləcək əlavələrdir. Test imtahanında azı 30 bal toplamış təhsilverənlər sertifikatlaşdırmanın müsahibə mərhələsinə keçə biləcəklər. Həmin müəlilimlərin vəzifə maaşlarına 10 faiz, 50 baldan yuxarı nəticə göstərənlərin isə əməkhaqqına 35% əlavələr ediləcək.