Qida Təhlükəsizliyi Agentliyinin Şamaxıda apardığı monitorinq zamanı Məşədi Əzizbəyov küçəsində yerləşən “Bizim dönər” adlı iaşə obyektində nöqsanlar aşkar olunub.

Fiziki şəxs Babək İbrahimova məxsus obyektin qida təhlükəsizliyi qeydiyyatına alınmadan qanunsuz fəaliyyət göstərdiyi, dönərin standartlara cavab verməyən şəraitdə hazırlandığı məlum olub.

Müəssisənin fəaliyyəti nöqsanlar aradan qaldırılanadək məhdudlaşdırılıb. Agentlik müvafiq araşdırmalar və yoxlama-nəzarət tədbirlərini davam etdirir.

Qəbələnin Soltannuxa kəndinin yolları hələ ötən əsrin 50-60-cı illərində salınıb. Kənd sakinlərinin sözlərinə görə, elə həmin dövrdə kəndə asfalt çakilib. Ancaq aradan keçən illər nəticəsində həmin asfalt qatı da tamamilə sıradan çıxıb. Sakinlər isti aylarda toz, yağış mövsümündə isə palçıq əlindən yollarda hərəkət etməyin mümkünsüz olduğunu bildirirlər.

Sakinlər kəndə təcili yardım və digər operativ nəqliyyat vasitələrinin gəlişində problem yaşandığını deyirlər. Həmçinin öz avtomobilləri yararsız yollarda tez-tez sıradan çıxır.

Kənd yollarından ən çox əziyyət çəkənlərdən biri də dərsə gedən şagirdlər və onları aparan valideynlərdir. Kənd bələdiyyəsindən məsələ ilə bağlı münasibət öyrənməyə çalışdıq. Bələdiyyənin nümayəndəsi kənd yollarında vaxtaşırı təmir işləri aparıldığını bildirdi. Yolların asfaltlanmasına gəlincə...

Belə görünür, Soltannuxa kənd sakinlərinin nə zaman ötən əsrdən qalma yollardan istifadəsinə son qoyulacağı naməlum olaraq qalır... Ümid edirik problem tez bir zamanda həll olunar.

Magistral yol 5 mindən çox əhalisi olan kəndin tam ortasından keçir. 1000-ə yaxın şagirdin oxuduğu məktəb də yolun kənarında yerləşir. Gündə yüzlərlə piyadanın istifadə etdiyi yolun 1 hissəsində piyada keçidi və işıqfor olsa da bəzi sürücülər nəinki sürəti azaltmır, hətta, işıqforun qırmızı işığına belə məhəl qoymur. Nəticədə bədbəxt hadisələr qaçılmaz olur.

Yoldan hər gün qorxu içində istifadə edən sakinlər bədbəxt hadisələrin qarşısının alınması üçün aidiyyatı qurumların tədbir görməsini istəyir.

Ekspertlər də hesab edir ki, bu yolda qəzaların artmasının başlıca səbəbi yol hərəkəti iştirakçılarının qaydaları pozmasıdır. O ki, qaldı görüləcək tədbirlərə....

Daxili İşlər Nazirliyinin Mətbuat Xidmətindən isə sorğumuza cavab olaraq bildirildi ki, Şəki-Qax avtomobil yolunun Qoxmuq kəndindən keçən hissəsində xüsusi texniki vasitələrin quraşdırılması ilə bağlı sakinlər tərəfindən müraciət edilib.

Həmin əraziyə baxış keçirilib və xüsusi texniki vasitənin quraşdırılacağı yer müəyyənləşdirilib. Yaxın zamanda qeyd olunan məsələnin müsbət həlli istiqamətində zəruri tədbirlər görüləcək.