Şəkidə ikisi azyaşlı olmaqla üç nəfəri sahibsiz it dişləyib. Belə ki, Şəkinin Çayqaraqoyunlu kənd sakini, 3 yaşlı Cəlal Osmanov və Şəki kənd sakini 7 yaşlı Zəhra Yadigarlı it dişləməsi xəsarəti ilə Şəki Rayon Mərkəzi Xəstəxanasına müraciət ediblər.

Cəlal Osmanova sağ budun, Zəhra Yadigarlıya isə sağ baldırın it dişləməsi dioqnozu qoyulub. 60 yaşlı Şəki şəhər sakini Cahangir Salmanov da sağ baldırın it dişləməsi xəsarəti ilə Şəki RMX-a müraciət edib. Hər üç şəxsə lazımi tibbi yardım göstərilib, quduzluq əleyhinə peyvənd vurulduqdan sonra ambulator müalicə almaq şərti ilə evə buraxılıblar.

Zaqatalada avtomobil yanıb. Gecə saat 3 radələrində rayonun Aşağı Tala kəndinin ərazisində Xəlil Əmirxanaova məxsus “Opel Vektra” markalı minik avtomobilində baş verən yanğının söndürülməsi üçün əraziyə Zaqatala rayon Dövlət Yanğından Mühafizə Hissəsinin texnikası və şəxsi heyəti cəlb olunub. Avtomobilin yanar konstruksiyaları yanıb. Yanğın zamanı xəsarət alan olmayıb. Araşdırma aparılır.

Şəki Tibb Kollecində “Yaşıl dünyanın əlvanlığı-kəlağayı” adlı tədbir keçirilib. Tədbirdə kollecin rəhbərliyi, müəllimləri və tələbələr iştirak edib. Çıxışlarda Azərbaycan mədəniyyətinin mənəvi irsini, estetik dəyərlərini özündə əks etdirən kəlağayının yaranma tarixi, atributları və ornamentləri barədə məlumat verilib.

Vurğulanıb ki, ölkəmizdə kəlağayı sənətinin köklü ənənələri var. Daha sonra kələyağı ilə bağlı rəqs müsabiqəsinin qalibi olan bir qrup tələbə təltif olunub. Ardınca tələbələr Azərbaycan kəlağayısını vəsf edən mahnı və şeirlər səsləndirib, rəqs kompozisiyası təqdim edilib.

Şəki-Zaqatala Regional Təhsil İdarəsinin təşkil etdiyi “Zəfər” elm müsabiqəsinin qalibləri mükafatlandırılıb. Tədbirin -- Müzəffər ordumuzun Vətən müharibəsində qazandığı tarixi Zəfəri əbədiləşdirmək və yaradıcı təfəkkürü ilə seçilən istedadlı şagirdləri üzə çıxarmaq məqsədini daşıdığı vurğulanıb.

Qaliblər Şəki-Zaqatala Regional Təhsil İdarəsinin diplomları və Təhsil İşçiləri Azad Həmkarlar İttifaqı Şəki rayon Komitəsinin müxtəlif hədiyyələri ilə mükafatlandırılıb. Tədbir şagirdlərin ifasında şanlı zəfərimizə həsr olunmuş ədəbi-bədii kompozisiyalarla davam edib.

"Yaşıl dünya naminə media həmrəyliyi"

Şəki-Zaqatala Regional Mədəniyyət İdarəsinin təşkilatçılığı ilə "Yaşıl dünya naminə media həmrəyliyi" adlı tədbir keçirilib. İştirakçılar əvvəlcə məktəblilərin əl işlərindən ibarət sərgi ilə tanış olublar.

Daha sonra keçirilən dəyirmi masada çıxış edənlər “Yaşıl dünya naminə həmrəylik ili” çərçivəsində ictimai və sosial maarifləndirmə, eləcə də təbliğat və təşviqat məsələlərində medianın əhəmiyyətli rolundan bəhs ediblər. Ardınca Şəki şəhər Uşaq İncəsənət məktəbinin kollektivi konsert proqramı ilə çıxış edib. Sonda media nümayəndələri Şəki-Zaqatala RMİ tərəfindən təltif edilib.

Bölgələrdə həkim çatışmazlığı ilə bağlı məsələ gündəmdədir. Milli Məclisdə də müzakirə olunan problemlə bağlı əməkdaşlarımız Şimal-Qərb bölgəsində araşdırma aparıb. Məlum olub ki, bəzi rayonlarda və ucqar kəndlərdə sakinlər məhz bu səbəbdən qonşu rayonlara üz tutmalı olur. Həkim və tibbi avadanlıq çatışmazlığı hətta bəzi hallarda insanların həyatını itirməsi ilə nəticələnir. Bölgədəki vəziyyəti təfərrüatı ilə sujetdən öyrənək...

Şəkidə ölümlə nəticələnən ağır yol qəzası baş verib. Ötən gün Qudula kəndi ərazisində “Mercedes” markalı avtomobilin sürücüsü Təbriz Vəliyevin idarəetməni itirməsi səbəbindən nəqliyyat vasitəsi aşıb. Hadisə zamanı xəsarət alan avtomobildə olan sərnişin, 39 yaşlı Zamir İsmayılov bu gün xəstəxanada dünyasını dəyişib. Faktla bağlı cinayət işi başlanılıb.