Ağsuda Şıxməzid Xanəgah kompleksində aparılan arxeoloji qazıntılarda yeni tarixi faktlar üzə çıxıb. Türk dünyasının mühüm dini-mədəni abidəsi kompleks tədqiqat mərhələsindədir.

Azərbaycanda ilk dəfə tütün sahəsi üzrə sığorta ödənişi həyata keçirilib. Ölkədə əkilən 2600 hektar tütün sahələrinin 98%-i Şəki-Zaqatala regionunda yerləşdiyindən aqrar sığorta ödənişləri də bu regiondakı fermerlərə edilib.

Şəkidə müasir Azərbaycan poeziyasının istedadlı nümayəndəsi, Azərbaycan Yazıçılar Birliyinin Şəki bölməsinin sədri, şair-publisist Vaqif Aslanın anadan olmasının 75 illiyinə həsr olunmuş yubiley tədbiri keçirilib. Şəki şəhər Heydər Əliyev Mərkəzində keçirilən yubiley tədbirində İcra Hakimiyyətinin rəsmiləri, Milli Məclisin deputatları, Mədəniyyət Nazirliyinin, Milli Elmlər Akademiyasının, Yazıçılar Birliyinin üzvləri, ziyalılar iştirak ediblər. Şairin kitablarından ibarət sərgi ilə tanışlıq olub. Yubiley tədbirində çıxış edənlər Şəkinin görkəmli şəxsiyyətləri, istedadlı insanları ilə Azərbaycanın mədəniyyət, incəsənət, ədəbiyyat tarixində önəmli rol oynadığını, belə şəxslərdən birinin də məhsuldar və istedadlı qələm ustası Vaqif Aslan olduğunu bildiriblər. Həmçinin çıxış edənlər şairin yaradıcılığını, pedaqoji fəaliyyətini yüksək dəyərləndirib, onun haqqında səmimi ürək sözlərini, xatirələrini bölüşüblər. 75 illik yubileyi münasibətilə yubilyara mükafatlar və xatirə hədiyyələri təqdim edilib. Tədbirin bədii hissəsində Vaqif Aslanın şeirləri səsləndirilib, 4 saylı Uşaq musiqi məktəbinin təqdimatında şairin sözlərinə bəstələnmiş mahnılar ifa olunub.