İsmayıllı şəhərində Uşu Sanda idman növü üzrə ölkə çempionatı keçirilib. Ümumilikdə 300-dən çox idmançının iştirak etdiyi yarışda Şəkidən 15 idmançı mübarizəyə qatılıb. Gərgin mübarizənin sonunda onlardan 3 nəfər 1-ci yerə, 6 nəfər 2-ci yerə, 2 nəfər isə 3-cü yerə layiq görülüb.

Ötən gecə güclü küləklə müşayiət olunan leysan yağışı Şəkidə bir sıra fəsadlara səbəb olub. Güclü külək şəhərin "Yuxarı Baş" Milli Tarix-Memarlıq Qoruğu ərazisində irigövdəli ağacı və elektrik dirəyini aşırıb. Nəticədə ərazidə elektrik enerjisinin təchizatında fasilə yaranıb. İrigövdəli ağac isə yaxınlıqdakı işıq dirəyinin üzərinə aşaraq onu sıradan çıxarıb. Aidiyyəti qurumların əməkdaşları hadisə yerinə cəlb olunub. Bundan başqa, şəhərin müxtəlif ərazilərində və Oxud kəndində də irigövdəli ağaclar aşıb. Təbii fəlakət səbəbi ilə şəhərin bəzi hissələrində elektrik enerjisinin və suyun verilişində fasilə yaranıb. Fəsadların aradan qaldırılması istiqamətində iş aparılır.

Böyük Qafqaz dağlarının ətəyində yerləşən Şamaxı tarix və mədəniyyət həvəskarları üçün əsl xəzinədir. Bu səbəbdən turistlərin də diqqətini daim cəlb edir. Bəs, Şamaxıda turizm üçün imkanlar necədir? Əməkdaşımızın araşdırmasını izləyək...

Şəki Şəhər İcra Hakimiyyətinin təşkilatçılığı ilə 15 iyun – Milli qurtuluş gününə həsr olunmuş tədbir keçirilib. Rayon administrasiyası, ictimaiyyət nümayəndələrinin iştirak etdiyi tədbirdə “Qurtuluşdan zəfərə” adlı videoçarx nümayiş olunub. Rəsmi hissədə çıxış edənlər müstəqil dövlətimizin qurtuluş tarixində Heydər Əliyevin xilaskarlıq missiyasından geniş söhbət açıblar. Vurğulanıb ki, Azərbaycan xalqı 1990-cı illərin əvvəllərində düşdüyü iqtisadi böhrandan zəngin idarəçilik təcrübəsinə malik, nüfuzlu dövlət xadimi Heydər Əliyevin müdrik, uzaqgörən siyasəti nəticəsində xilas olub. Tədbirin sonunda rayon ictimai siyasi həyatında fəal iştirakına görə Qarabağ Müharibəsi Əlilləri, Veteranları və Şəhid Ailələri İctimai Birliyinin Şəki rayon filialının sədri Məmmədnuru Əzizov, Böyük Britaniyada keçirilən “Qızıl istedad müsabiqəsi 2025”-in qalibi olan gənc musiqiçi Ayan Əhmədzadə fəxri fərman və hədiyyələrlə təltif ediliblər.