İsmayıllı rayonunda yanğın baş verib. Dövlət Yanğından Mühafizə Hissəsinin məlumatına görə, günorta saatlarında qeydə alınan yanğın zamanı yeddi il öncə fəaliyyətini dayandırmış quşçuluq ferması, taxta sexi və plastik qapı-pencərə sexi tamamilə yanıb. Ətrafda yerləşən şadlıq sarayı və iki ədəd benzindoldurma məntəqəsi yanğından mühafizə olunub. Sakinlər hadisənin ətrafdakı kol-kosun yanması səbəbindən baş verdiyini iddia ediblər. Sahibkarlara külli miqdarda ziyan dəydiyi bildirilir. Faktla bağlı araşdırma aparılır.

Hadisə Qax rayonu İsmayıl Dağıstanlı küçəsindəki avtomobil təmiri sexində baş verib. Yanğın yerinə Qax rayon DYMH-nin texnikaları cəlb olunub. 49 yaşlı Vüqar Əhmədova məxsus "Tofaş" markalı minik avtomobili tamamilə yanıb. Fakt araşdırılır.

Qəbələnin Quşlar kəndi bir sıra problemlərdən əziyyət çəkir. Sakinlərin əsas narahatlığına səbəb isə yolsuzluqdur. Şəhərdən 35-40 km aralıda yerləşən kəndə gedib-gəlmək həm kənd sakinləri, həm də buraya yolu düşənlər üçün əsl sınağa çevrilib.

Turnirdə 8 ölkədən 300-ədək şahmatçı çıxış edəcək. "Sheki Open" Azərbaycan Şahmat Federasiyası tərəfindən təşkil edilən "Chess Tour Azerbaijan" seriyasının bir mərhələsidir. Qeyd edək ki, İsveçrə sistemi ilə keçiriləcək və 9 turdan ibarət olacaq turnir iyunun 25-də başa çatacaq. Yarışın ümumi mükafat fondu isə 23.650 AZN təşkil edir.

Şimal-qərb bölgəsinin əsas kənd təsərrüfatı məhsullarından olan fındığın bu il ötən illə müqayisədə 20-30, bəzi ərazilərdə isə hətta 50 faiz daha az məhsul verəcəyi gözlənilir. Yağıntının normadan artıq olması məhsuldarlığa mənfi təsir göstərməklə yanaşı, xəstəliklərin artmasına da səbəb olub.

Mədəniyyət Nazirliyi və Məktəbəqədər və Ümumi Təhsil üzrə Dövlət Agentliyinin birgə təşkilatçılığı ilə “Məktəblilər üçün teatr pedaqogikası” layihəsinə start verilib. Layihə çərçivəsində 18-19 iyun tarixlərində Şəki-Zaqatala Regional Təhsil İdarəsinin tabeliyində olan ümumitəhsil məktəblərindən 10-16 yaş arası 600 məktəbli Şəki Dövlət Dram Teatrında “Kitabı-Dədə Qorqud" eposunun ən maraqlı boylarından biri olan “Dəli domrul” tamaşasını izləyəcək. “Dəli Domrul” tamaşası Azərbaycan ədəbiyyatının və ümumilikdə türk dünyasının ən qədim epik abidələrindən olan “Kitabi-Dədə Qorqud” dastanının eyni adlı boyu əsasında səhnələşdirilib. Tamaşa qəhrəmanlıq, sevgi, cəsarət və ilahi ədalət kimi mövzuları özündə birləşdirir.