Dövlət İmtahan Mərkəzinin (DİM) mayın 20-də ali təhsil müəssisələrinə III ixtisas qrupu üzrə Şəki şəhərində keçirdiyi qəbul imtahanı başa çatıb. Şəkidə III ixtisas qrupu üzrə qəbul imtahanı 5 mərkəzdə aparılıb. Qəbul imtahanları Şəki şəhər 8, 12, 17 nömrəli və Qoxmuq kənd tam orta məktəblərdə, həmçinin Fizika-riyaziyyat və humanitar təmayüllü liseydə təşkil olunub. Ümumilikdə 1133 abituriyentin iştirakının nəzərdə tutulduğu imtahanların idarə olunmasına 14 imtahan rəhbəri və 111 nəzarətçi cəlb edilib. İmtahanların keçirilməsi üçün 92 zal ayrılıb. Zallarda abituriyentlərin rahat şəkildə imtahan verməsi üçün zəruri şərait yaradılıb. İmtahan saat 11:00-da başlanıb və 3 saat davam edib. Bütün imtahan mərkəzlərində III ixtisas qrupu üzrə qəbul imtahanı mövcud təlimata uyğun şəkildə aparılıb və heç bir qanun pozuntusuna yol verilməyib. 

Ölkə və dünya üzrə bir çox şahmat yarışlarından medallar, kuboklar, sertifikatlar sahibidir Süleyman. Onunla valideynləri, qohumları, müəllimləri, məşqçisi fəxr edir. 16 yaşlı Süleyman aprel ayında 54 ölkədən 509 şahmatçının mübarizə apardığı yarışda 2-ci yerə çıxaraq gümüş medala layiq görülüb. Süleymanın ən böyük dəstəkçisi olan anası ondan həmişə yüksək nailiyyətlər gözlədiklərini deyir. 

Şamaxı rayon Mədəniyyət Mərkəzində Azərbaycanın xalq şairi, bədii-ictimai fikir tarixində yeni ədəbi məktəbin banisi Mirzə Ələkbər Sabirin anadan olmasının 161 –ci ildönümünə həsr olunmuş bədii qiraət müsabiqəsinin yekun mərhələsi keçirilib. Öncə dahi şairin məzarı ziyarət edilib. Mirzə Ələkbər Sabirin ev Muzeyinin direktoru, eləcə də digər çıxış edənlər bu müsabiqəni xalqımızın milli-mənəvi dəyərlərinə, Mirzə Ələkbər Sabir irsinə ən böyük qiymət kimi dəyərləndirib.  Keçirilən yekun bədii qiraət müsabiqəsində qalib olan şagirdlər fəxri fərman, təşəkkürnamə, sertifikat və qiymətli hədiyyələrlə mükafatlandırılıb. Həmçinin Şamaxı rayon Mirzə Ələkbər Sabirin ev Muzeyinin kollektivi “Muzey sahəsində səmərəli fəaliyyətlərinə görə” Fəxri fərmanla təltif edilib.

Şamaxı Rayon Mərkəzi Xəstəxanasında Ümumdünya Arterial Hipertoniya ilə Mübarizə Günü münasibəti ilə flashmob keçirilib. Flashmobda Şamaxı Rayon Mərkəzi Xəstəxanasında çalışan tibbi heyət iştirak edib. Arterial hipertoniya arterial təzyiqin normadan yuxarı qalxması halıdır. Hipertoniyadan əziyyət çəkənlərin üçdəbiri müalicə alır və onların təxminən 12 faizi tibbi nəzarət altındadır, xəstələrin təxminən 45 faizi arterial təzyiqin yüksək olduğundan xəbərsizdir. Flaşmobun keçirilməsində məqsədsə bu xəstəliyə diqqət çəkmək və insanları maarifləndirməkdir.