Ötən gün tam orta təhsil səviyyəsi üzrə buraxılış imtahanları keçirilib. Dövlət İmtahan Mərkəzinin məlumatına görə, 29 şəhər və rayonda keçirilən imtahan üçün ümumilikdə 211 bina və 3741 zalı ayrılıb. Çilov adasında yerləşən məktəbə imtahan rəhbəri və materialların daşınması “Azneft” İstehsalat Birliyinin helikopteri vasitəsilə həyata keçirilib.

İmtahanlarda 50 min 498 şagirdin iştirakı nəzərdə tutulurdu. Həmçinin 20 nəfər fiziki məhdudiyyətli abituriyent də iştirak edib. İlkin məlumatlara əsasən, 6 şagirddə mobil telefon aşkarlandığı üçün imtahandan xaric edilib.

1 nəzarətçi isə köçürməyə şərait yaratdığı üçün imtahandan kənarlaşdırılıb. Qeyd olunan hallarla bağlı araşdırma aparılacaq. Eyni zamanda imtahanda iştirak etmək üçün tələb olunan sənədləri qaydasında olmayan şagirdlər də olub. Bu gündən etibarən DİM-də imtahan protokolları və cavab vərəqlərinin emalına başlanılacaq. Nəticələrinsə yaxın bir ay ərzində elan olunması nəzərdə tutulur. Əməkdaşlarımız imtahan prosesini Şəki və Bərdədə izləyiblər. 

Şamaxıda ASAN könüllüləri arasında “Şuşa üçün yarat” müsabiqəsi keçirilib. 80 gənc arasında gerçəkləşən müsabiqənin əsas məqsədi iştirakçıların innovasiyayönümlü potensiallarının aşkarlanması, onlar arasında komanda ruhu və quruculuğunun, ideya formalaşdırma bacarıqlarının inkişaf etdirilməsi, həmçinin gənclərə vətənpərvərlik ruhunu aşılamaq olub. Müsabiqə çərçivəsində “Şuşanı tanıt” komanda quruculuğu oyunları, Ulu Öndər Heydər Əliyevə həsr olunmuş intellektual yarış və “Şuşa üçün yarat!” ideya müsabiqəsi təşkil olunub. İdeyaların təqdimatından sonra ilk 3 yerə layiq görülən komanda dəyərli hədiyyələrlə mükafatlandırılıb. Həmçinin bütün iştirakçılar sertifikatla təltif olunublar.

Qobustan Heyvandarlıq Nümayiş Kompleksinə xaricdən yeni cins damazlıq heyvanlar gətirilib. “Aberdin-Anqus” cinsli inəklər kompleksin iribuynuzlu heyvanların saxlama fermasında standartlara uyğun şəraitdə saxlanılır, qidalandırılır və baytar nəzarəti edilir. Karantin müddəti bitdiyinə görə artıq inəklərin satışına başlanılıb. Bura iki il əvvəl istifadəyə verilən Qobustan Heyvandarlıq Nümayiş Kompleksidir. Buradakı heyvanların 60% dövlət güzəşti ilə satışı təşkil edilir. Xarici cins damazlıq heyvanların satışının təşkil edilməsində əsas məqsəd fermerlərin cins heyvanlara əlçatanlığına, ölkədə heyvanların cins tərkibinin yaxşılaşdırılmasına nail olmaqdı. Avropada geniş yayılmış və vətəni Şotlandiya olan cinslərdən olan ətlik istiqamətli Aberdin-Anqus inəkləri ekoloji şəraitə tez uyğunlaşan cins damazlıq heyvanlardır. Bu heyvanlar yerli cinslərin damazlıq xüsusiyyətlərinin təkmilləşdirilməsində istifadə olunur. Aberdin-Anqus inəklərinin məhsuldarlıq göstəriciləri olduqca yüksəkdir. Bu inəklərinin ətində yağ faizi digər inəklərə nisbətən 6 dəfə aşağıdır. Heyvanların çəkisi 1100 kiloqrama qədər çatır. İntensiv yemləmə zamanı çəki sutkada 800-850 qram artır. Satışa çıxarılan heyvanların yaşı 18-26 ay olmaqla, 3-8 aylıq boğaz düyələrdir. Burada fermerlər heyvanlara baxış keçirərək, sərgi satış mərkəzində istədikləri heyvanları əldə edə, həmçinin onlarla bağlı ətraflı məlumat əldə edə bilərlər. Bundan əlavə, 2022-ci il ərzində Kompleks vasitəsilə Təchizatçı şirkətlər tərəfindən ölkəyə gətirilmiş və yerli damazlıq təsərrüfatları tərəfindən yetişdirilmiş ümumilikdə 1261 baş iribuynuzlu cins-damazlıq heyvanların satışı həyata keçirilib ki, bunun da 219 başı yerli damazlıq təsərrüfatların payına düşür. Hansı ki, bu da öz növbəsində yerli damazlıq təsərrüfatlarının inkişafına öz tövhə və dəstəyini verib.