Müsəlman təqviminin ən gözəl və fəzilətli aylarından sayılan Ramazan ayında icra olunan əsas fərzlərindən biri də oruc tutmaqdır. 11 ayın sultanı olan bu ayda Ölkəmizdə də oruc tutanların sayı yetərincədir. Lakin, insanların bir qismi səhhətlərində yaranan problemlərə görə oruc tuta bilmirlər. Hər il Ramazan ayında insanları ən çox düşündürən suallardan biri də, belə insanların oruc savabını başqa hansı şəkildə qazana bilmələridir. Oruc tutmaq üçün ən vacib şərtlərdən biri də, insanın sağlıq və əqli durumunun normal olmasıdır. Oruc tutduğumuz zaman daxili orqanlar istirahət etdiyindən, sağlam insan üçün bu həm də tibbi baxımdan olduqca faydalıdır. Lakin, hamilə qadınların, uşaq əmizdirən anaların, azyaşlıların və onkoloji, diabetik, hipertonik, mədə bağırsaq xəstələrinin gün ərzində ac və susuz qalaraq oruc tutması əks göstəriş sayılır. Oruc tutulan zaman iftar və imsaq zamanı qida rasionuna diqqət edilməlidir. Xüsuən də bu il Ramazan ayının şəkərburalı,paxlavalı, plovlu Novruz bayramı və çərşənbələrə təsadüf etdiyi ərəfədə bu, olduqca vacibdir. Ağır və çox qida qəbul etmək gün ərzində boş olan orqanları həddindən artıq yüklədiyindən, çox zərərlidir. Bol maye, yüngül və sulu qidalar, meyvə və tərəvəzlər ən ideal qidalar sayılır. Humanizm və bərabərlik dini sayılan İslamda oruc tutmaq təkcə ac qalmaqdan ibarət deyil. Oruc tutan hər bir insan həmdə nəfsini və səbrini tərbiyələndirir. Paylaşmaq, yardımlaşmaq ayı sayılan Ramazan ayında ehtiyac sahibləri üçün iftar vermək, ay sonunda isə ailədə hər fərd üçün ayrılıqda müəyyən edilmiş məbləğdə fitrə sədəqəsi çıxarmaq vacib və savab əməllərdən sayılır. Allah hər kəsin tutduğu orucları, etdiyi ibadətləri, verdiyi fitrə və sədəqələri qəbul etsin...