2020-ci ilin əvvəllərində yenidən qurularaq istifadəyə verilən və uzunluğu 22 kilometr olan Çuxuryurd-Sis-Qaleybuğurd-Keçməddin-Qaladərəsi avtomobil yolunun bir neçə hissəsi dağılıb, asfalt örtüyündə çökmələr və yolun ortasında iri çatlar əmələ gəlib. Ən çox sürüşmə yolun 6-8-ci kilometrliyində qeydə alınır. 29-cu kilometrlikdə yolun bir hərəkət zolağı dərəyə doğru sürüşərək dağılıb, 14 metr uzunluğunda dərin çuxur yaranıb. Yolun digər tərəfində isə asfalt örtüyü dağılaraq iri qabarmalar əmələ gəlib ki, bu da sürücülər üçün təhlükə yaradır. Əsasən də dumanlı havada və axşam saatlarında yoldan istifadə edən sürücülər çətinliklə üzləşirlər. Digər tərəfdən, sürüşmə ərazisində təhlükədən xəbər verən yol nişanlarının olmaması da sürücülərin qəza törətməsinə səbəb olur. Dörd kəndi birləşdirən, turizm əhəmiyyətli bu yolda ikinci dəfədir ki, torpaq sürüşməsi baş verir. Sakinlərin sözlərinə görə, çatlar hər gün genişlənir, çökmələr böyüyür. Uzun illər yolun yenidən qurulmasını arzulayan sakinlər yeni yolun qısa vaxt ərzində yararsız vəziyyətə düşəcəyindən narahatdırlar. Əraziyə 19 saylı Xüsusi Təyinatlı Yol İdarəsinin canlı qüvvəsi və texnikaları cəlb olunub. Sürüşmə nəticəsində yararsız vəziyyətə düşən avtomobil yolunun bərpasına başlanılıb. Sözügedən avtomobil yolunda təmir işləri aparıldığı üçün yağışlı və dumanlı havalarda əsasən də axşam saatlarında bu yoldan hərəkət edən sürücülərə diqqətli olmaları tövsiyyə olunur.