Bu gün Şəki şəhər "20 Yanvar" küçəsində zəncirvari yol qəza hadisəsi baş verib. Belə ki, 24 yaşlı Şəki sakini Ağahüseyn Abdullayevin idarə etdiyi "Mercedes" markalı avtomobil idarəetməni itirərək 70 yaşlı Şəki sakini Akif Abdullayevin sükanı arxasında olduğu "Nissan" markalı avtomobillə toqquşub.
Toqquşmadan sonra nəzarətdən çıxan avtomobillər yolun kənarında dayanan daha 5 avtomobilə çırpılıb. Hadisə nəticəsində sürücü Akif Abdullayev kəllə beyin və qapalı döş qəfəsi travması ilə, digər sürücü Ağahüseyn Abdullayev isə yüngül kəllə beyin travması ilə Şəki Rayon Mərkəzi Xəstəxanasına çatdırılıb. Yaralılara ilkin tibbi yardım göstərildikdən sonra ambulator müalicə almaq şərti ilə evə buraxılıblar. Faktla bağlı araşdırma aparılır.
